TELEVIZAR

 TELEVIZAR

Siamion Šarecki i Zianon Paźniak vystupili na minułym tydni z zajavami pra nieabchodnaść jak najchutčejšaha farmavańnia Časovaha ŭradu narodnaha davieru. Staršynia lehitymnaha orhanu zakanadaŭčaje ŭłady i histaryčny lider nacyjanalna-demakratyčnaje apazycyi miarkujuć, što demakratyčnyja vybary ŭ Biełarusi niemahčymyja, pakul A.Łukašenka pry ŭładzie, i što sapraŭdnyja pieramieny ŭ krainie mohuć adbycca tolki revalucyjnym šlacham.

Akupacyjny režym

Zajava Siamiona Šareckaha

Spadar Šarecki, jaki znachodzicca ŭ Vilni, ličyć, što hałoŭnym arhumentam u apošnich kadravych pierastanoŭkach u siłavych strukturach byŭ rasiejski ŭpłyŭ. U pieršuju čarhu heta prasočvajecca ŭ tym, što ŭsie novapryznačanyja ministry — rasiejcy. Ichnyja papiaredniki na pasadach “addana słužyli dyktatarskamu režymu, stvoranamu ŭ Biełarusi z dapamohaj rasiejskich šavinistyčnych kołaŭ, ale pa nacyjanalnaści byli biełarusy. Ich miescy zaniali ciapier pasłancy Maskvy, mnohija ź jakich źjaŭlajucca aficerami rasiejskich specsłužbaŭ. Apošni kadravy pieratrus u šerahach dyktatarskaha režymu nie pavinien užo ni ŭ koha vyklikać sumnievu, što, havoračy słovami kiraŭnikoŭ Rasiejskaj Federacyi, u Biełarusi zakančvajecca “začystka” isnujučaha režymu ad samich biełarusaŭ. Tym bolš, što heta paćviardžajecca i abrańniem kiraŭnika tak zvanaj “Pałaty” — taksama pa nacyjanalnaści rasiejca, jaki ŭžo, darečy, paśpieŭ źniavažyć biełaruskuju movu”, — zajaviŭ sp.Šarecki.

“Pa svaim nacyjanalnym składzie panujučy ŭ krainie dyktatarski režym źjaŭlajecca amal całkam rasiejskim, a ŭ adnosinach da Biełarusi — akupacyjnym. Nastupnym krokam, jaki moža adbycca ŭ Biełarusi, mabyć, stanie adchileńnie ad ułady samoha dyktatara i zamiena jaho na mienš ambitnuju i bolš prymalnuju dla Rasiei asobu abo prymus siońniašniaha dyktatara zdać dziaržaŭny suverenitet Biełarusi na prapanavanych rasiejskimi šavinistami ŭmovach”, — zajaviŭ staršynia VS.

Takim čynam, zychodziačy sa słovaŭ sp.Šareckaha, u Biełarusi moža źjavicca treciaja siła, jakaja voźmie ŭdzieł u baraćbie za prezydenckuju pasadu, siła, što pakul nia maje mahčymaści adkryta ŭździejničać na ŭnutranuju palityku Biełarusi, ale ŭ jakoj chapaje resursaŭ, kab pradvyznačyć raskład prezydenckich vybaraŭ. I hlebu dla palityčnych źmienaŭ na karyść Maskvy padrychtuje, mahčyma, sam Łukašenka, jaki pakul moža ličyć siabie adzinym, chto zdolny ŭpłyvać na sytuacyju. Jaho zbrojaj u baraćbie za prezydenckuju pasadu, na dumku sp.Šareckaha, stanuć niedemakratyčnyja vybary, u jakich pieramahaje toj, chto trymaje ŭładu.

“Kali nia budzie svabodnych vybaraŭ, nijaki kandydat ad apazycyi nie pieramoža. I jak pakul bačna, svabodnych vybaraŭ nia budzie. Tym bolš što ŭzmacniajucca rasiejskija šavinistyčnyja struktury. Ja taksama staju za adnaho kandydata, ale pierš treba niešta zrabić dla taho, kab u Biełarusi adbylisia demakratyčnyja vybary. Łukašenka, a razam ź im rasiejskija šavinisty nie dazvolać, kab demakrat staŭ prezydentam, bo demakratyja ŭ Biełarusi — značyć suverenitet Biełarusi. Treba dumać zusim nie pra toje, kaho abrać adzinym kandydatam ad apazycyi, a pra toje, kab byli ŭmovy dla demakratyčnych vybaraŭ i, takim čynam, dla pieramohi”, — skazaŭ nam sp.Šarecki.

Zychodziačy z hetaha, sp.Šarecki prapanuje, kab prezydenckija, a taksama parlamenckija vybary pravioŭ časovy Ŭrad nacyjanalnaha davieru. Heta kardynalna źmianiła b scenar budučych prezydenckich vybaraŭ i zrabiła ich sapraŭdy svabodnymi. Sp.Šarecki zapeŭnivaje, što na hety raz, u adroźnieńnie ad travieńskich 1999 hodu, vybary pad patranatam Uradu narodnaha davieru akažucca sapraŭdnymi.

A.B.

Biełaruś u miašku

Zvarot Zianona Paźniaka

Zianon Paźniak, jaki znachodzicca ŭ Ńju-Jorku, na hetym tydni źviarnuŭsia da suajčyńnikaŭ sa zvarotam. “Zmahajciesia!” — taki ŭ jaho zahałovak.

“Pryśpiešvajecca kadravaje afarmleńnie rasiejskaj akupacyi Biełarusi i stvarajucca palityčnyja ŭmovy dla zdačy biełaruskaj dziaržavy pad Rasieju, — adznačaje Z.Paźniak. — Pra heta śviedčać čarhovyja čystki va ŭładzie ŭ Miensku, jakija adbylisia 27 listapada. Ciapier va ŭradzie Łukašenki nie zastałosia nivodnaha biełarusa. (Zvolnieny navat usłužlivy ministar kultury Sasnoŭski.) Na miescy biełarusaŭ pastaŭlenyja funkcyjanery rasiejskaha FSB”. Paźniak miarkuje, što “apošnim (paśla čystak i zrableńnia “spravy”) Maskva likviduje Łukašenku. Dziela hetaha siarod vydalenych (kab vyhladaŭ paciarpiełym) buduć rychtavać svajho Kaštunicu. Biełarusy pavinny zrazumieć, što z 27 listapada ŭ Biełarusi kiruje poŭnaściu rasiejski akupacyjny ŭrad, jaki składajecca całkam z rasiejcaŭ”. I taksama: “Na siońniašni dzień Biełaruś užo ŭ miašku. Zastałosia tolki zaviazać. Toje, što biełarusy ŭ hetym miašku spakojna siadziać, tłumačycca tym, što jany nia viedajuć, što ich čakaje. Ale kali miašok zaviažuć, to razumieć budzie ŭžo pozna”. Na dumku lidera Kanservatyŭna-Chryścijanskaj Partyi BNF, nijakich realnych prezydenckich vybaraŭ u Biełarusi ŭ takich umovach nia budzie. “Moža adbycca tolki falšyvaja vybarčaja prafanacyja dziela abhruntavańnia i zamacavańnia akupacyjnaj palityki rukami i nahami biełarusaŭ. Ułada ŭ Biełarusi Maskvoj užo zachoplena. Zastałosia jaje tolki lehitymizavać. Kali ž hetaha nie atrymajecca, to Rasieja pasprabuje arhanizavać pieravarot i potym — chutki zachop nacyjanalnaj majomaści i likvidacyju Biełaruskaj dziaržavy”.

“Što ciapier rabić?” — stavić pytańnie Z.Paźniak i adkazvaje hetak: “Nieabchodna nasuprać akupacyjnaj ułady stvaryć zakonny biełaruski Ŭrad narodnaha davieru. Jašče jość realnaja mahčymaść. Ź inicyjatyvaj stvareńnia zakonnaha Biełaruskaha Ŭradu vystupiŭ zakonny staršynia Viarchoŭnaha Savietu i vykanaŭca funkcyjaŭ Prezydenta Biełarusi Siamion Šarecki”. “Biełaruskija elity musiać zrazumieć, što nie prezydenckija vybary (pa praviłach akupacyjnaha režymu), a stvareńnie zakonnaha Biełaruskaha Ŭradu jość pieršym krokam, kab zapabiehčy źniščeńniu dziaržavy i niezaležnaści”.

B.T.