Naviny za tydzień

 Naviny za tydzień

Aryštavanyja Čyhir i Bykaŭ

Učora ŭ Miensku na aŭtamabilnym rynku ŭ Ždanovičach milicyja aryštavała Alaksandra Čyhira, małodšaha syna Michaiła Čyhira. Alaksandra vinavaciać u handli skradzienymi aŭtadetalami – jon mieŭ u Ždanovičach svoj biznes. Učora aryštavanyja taksama Vasil Bykaŭ, plamieńnik piśmieńnika, i Siarhiej Kalada. Suprać starejšaha syna Čyhira — Alaksieja — taksama ŭzbudžałasia kryminalnaja sprava, ale biespaśpiachova. Ciapier Alaksiej Čyhir žyvie ŭ Niamieččynie, dzie paprasiŭ palityčnaha prytułku. Michaił Čyhir źviazvaje hety aryšt z svaim žadańniem balatavacca ŭ prezydenty.

Antyintehracyjnaje stanovišča

Na pasiedžańni Prezydyjumu Rady BNR, jakoje adbyłosia ŭ Ńju-Jorku 3 lutaha, była vykazanaja zaniepakojenaść tym, “što niekatoryja kandydaty ŭ prezydenty Biełarusi, jakija nazyvajuć siabie demakratyčnymi, spadziajucca na padtrymku z boku Maskvy, u toj čas kali Kreml paśladoŭna pravodzić palityku likvidacyi biełaruskaj dziaržaŭnaści”.

Siabry Prezydyjumu vyrašyli, što vykazvacca adnosna paasobnych kandydataŭ Radzie BNR jašče nie para. Ale jany chacieli pieraścierahčy apazycyju suprać usialakich hulniaŭ z Maskvoju.

“U ciapierašnim kantekście “intehracyi” vielmi važna, kab antyintehracyjnaje stanovišča apazycyi było ŭsim jasnaje. Usia prezydenckaja kampanija musiła b stacca forumam apazycyi suprać sajuzu z Rasiejaj”, — uvažaje Staršynia Rady BNR Ivonka Surviłła.

B.T.

“Valancinki” — na rynku

U Słonimie 11 lutaha moładź z abjadnańnia “Vietraź” praviała akcyju, pryśviečanuju Dniu śviatoha Valancina. Na haradzkim rynku razdavalisia śviatočnyja nalepki i žujki z nadpisam “Love is...”, a taksama “valancinki” — vinšavalnyja kartki z adrasam “Vietrazia”. U akcyi ŭdzielničali 25 čałaviek.

Siarhiej Kraŭcoŭ, Słonim

Miłaradzie, damoŭ!

Miłarad Radzievič nie paśpieŭ abžycca ŭ Biełarusi. Pasoł Juhasłavii ŭručyŭ davierčyja listy Alaksandru Łukašenku letaś 3 kastryčnika. 4 kastryčnika Radzievič na svajoj pieršaj presavaj kanferencyi hańbiŭ ahresaraŭ z NATO, avanturystaŭ z Vašynhtonu i serbskuju apazycyju. Byŭ jon prafsajuznym dziejačom, dyrektaram archivu, kamunistam, tamu dziva što takim mała dyplamatyčnym čałaviekam. A ŭžo 5 kastryčnika Juhasłavija vinšavała Voisłava Kaštunicu, novaha, demakratyčnaha prezydenta.

Usiaho ŭ lutym Białhrad adklikaje z krainaŭ Uschodniaj Eŭropy 7 albo 8 pasłoŭ. I pieršym u hetym śpisie značycca Miłarad Radzievič jak samy adyjozny.

A biełaruskuju ambasadu ŭ Juhasłavii, jak i raniej, uznačalvaje Valer Bryloŭ — ziać byłoha ministra zamiežnych spravaŭ Ivana Antanoviča.

Pastka dla knihanošaŭ

U piatnicu byŭ uviedzieny ŭ dziejańnie novy “Paradak pieramiaščeńnia” ludźmi tavaraŭ praź biełaruskuju miažu. Hety paradak zabaraniaje pravozić praź miažu “drukavanyja i aŭdyjovizualnyja materyjały, inšyja nośbity infarmacyi, jakija mohuć nanieści škodu palityčnym i ekanamičnym intaresam Respubliki Biełarusi, jaje dziaržaŭnaj biaśpiecy, zdaroŭju i maralnaści hramadzianaŭ”. Pad hety niekankretny punkt moža padpaści zaraz faktyčna lubaja kniha na biełaruskaj movie.

Biełarusy padarvali “Biełaruskuju”?

6 lutaha na sajcie draniki.com źjaviłasia hetkaje ananimnaje paviedamleńnie: «Metro «Biełaruskaja—Kalcavaja». My biarem adkaznaść za terakt. Biełaruskaja Partyja Svabody». Kiraŭniki bepeesaŭcaŭ nazvali padobnuju infarmacyju pravakacyjaj.

Strach pierad Domašam

U minułuju subotu Siamion Domaš pravioŭ u Bieraści sustreču z hramadzkaściu, jakaja vielmi zacikaviła tutejšych žycharoŭ. Aktavaja zala klubu Biełaruskaha tavarystva hłuchich nie zmahła pryniać usich, chto žadaŭ naviedać sustreču z mahčymym budučym prezydentam. Hetym tydniem bieraściejskija ŭłady ŭ adkaz zahadali kiraŭnictvu Bieraściejskaha pradpryjemstva hłuchich razhledzieć pytańnie pra zvalnieńnie dyrektarki klubu, Leakadzii Ŭłasiuk, jakaja dała dazvoł na arhanizacyju spatkańnia. I administracyja musiła jaje zvolnić, inakš čynoŭniki harvykankamu pahražali skasavać ilhoty pa arendnaj płacie.

Dyferencyjacyja apłaty za vyšejšuju adukacyju

Uviali novuju systemu apłaty dla tych, chto vučycca za płatu. Pavodle ŭkazu Łukašenki, rektary VNU mohuć ciapier nie ŭzhadniać «naviersie» koštaŭ płatnaha navučańnia, a sami vyznačać ich adpaviedna pamieram ekanamičnych vydatkaŭ, uzroŭniu rentabelnaści VNU i popytu na kankretnyja specyjalnaści. Raniej tre było płacić davoli vialikija padatki z tych hrošaj, što atrymlivali VNU ad studentaŭ płatnych formaŭ navučańnia. A ciapier hetyja padatki admianili. Ale zaraz košty zaležać i ad popytu na peŭnyja dyscypliny, tamu nia ŭsie specyjalnaści patańniejuć, a samyja prestyžnyja mohuć zrabicca i najdaražejšymi.

Ułady chacieli b začynić NTV

Telekampanija NTV vystaŭlaje Ministerstvu suviazi Biełarusi rachunak za “kradziež reklamnaha času” Biełaruskim telebačańniem, što raspačaŭsia 3 lutaha. BT pačało krucić svaju reklamu zamiest abviestak NTV. NTV pahražaje padać na ich u sud abo zusim spynić pieradavańnie na Biełaruś. A biełaruskim uładam hetaha i treba napiaredadni prezydenckich vybaraŭ.

Novyja pryznačeńni

6 lutaha Łukašenka pryznačyŭ Michaiła Rusaha ministram sielskaje haspadarki j charčavańnia, kiraŭnika mienskaj milicyi Barysa Tarleckaha — pieršym namieśnikam ministra ŭnutranych spravaŭ, načalnikam kryminalnaj milicyi, Siarhieja Hurulova, hienerała z haradzienskaj bryhady, načalnikam hałoŭnaha štabu armii i pieršym namieśnikam ministra abarony zamiest hienerał-lejtenanta Michaiła Kazłova. Huruloŭ rodam z-pad Čyty – jašče adzin rasiejski hienerał u biełaruskaj armii.

A.K.

Dzień šukalnikaŭ sercaŭ

Kab vas nikoli nie nazvali čałaviekam biaz serca, prychodźcie 14 lutaha a 17-j na płošču Svabody. Parada: apranicie zručniejšy abutak, bo chadzić daviadziecca šmat. Špacyrujučy pamiž Niamihaj dy praspektam Skaryny, sačycie za ludźmi: jak pabačycie kupku ludziej ŭ nakidkach adnolkavaha koleru, adrazu kirujciesia da jaje i patrabujcie, kab vam dali serca (što praŭda, papiarovaje). Toj, chto źbiare najbolš sercaŭ, zmoža źmianiać ich na kasetu “More kachańnia” z najlepšymi pieśniami biełaruskich hurtoŭ pra kachańnie. Karaciej kažučy, daviadziecca addać sercajki. Ale nie žuryciesia: vašaha sapraŭdnaha kachajučaha serca nie zabiare nichto, akramia chiba ŭładalnicy ci ŭładalnika takoha samaha haračaha sercajka. Kali vy ŭžo sustrelisia, dyk nie hublajcie adno adnoha ŭ śviatočnym tłumie, a kali jašče nie – šukajcie svajo kachańnie na akcyi “Lubovi! Svabody! Pieramienaŭ!” 14 lutaha ad 17-j na Płoščy Svabody.

A.K.