“Biełavija” nie pakinie latać
Na pazaminułym tydni Eŭraźviaz abvieściŭ ab namiery zabaranić niekatorym vidam samalotaŭ, jakija stvarajuć zašmat šumu, karystacca eŭrapiejskimi aeraportami. Heta pastaviła pad pahrozu isnavańnie avijakampanijaŭ kolišniaha Savieckaha Sajuzu, jakija karystajucca “šumnymi” ŭkrainskimi albo rasiejskimi mašynami.
“Biełavija” taksama pacierpić ad hetaje pastanovy, ale, jak paviedamili karespandentu “NN” ŭ administracyi “Biełavii”, svajoj pracy jany nia spyniać. Ministerstva transpartu ŭtvaryła admysłovuju kamisiju pa pieramovach z Eŭropaj u “samalotnym” pytańni. Adpaviednuju pracu pravodziać pasolstvy Biełarusi.
Peŭnyja pośpiechi ŭžo dasiahnutyja, praŭda nia nami. Rasiejcy zmusili eŭrapiejcaŭ pahadzicca na toje, što ažyćciaŭlać čarternyja rejsy mohuć i “šumnyja” letaki. Adznačym, što nia ŭsie savieckija samaloty pryznanyja “šumnymi”. Eŭrastandartam adpaviadajuć Tu-154m, Jak-40, An-24, mahčyma, da ich dałučacca jašče niekatoryja marki.
U našaj “Biełavija” ŭsiaho 40 samalotaŭ — i “šumnych”, i “cichich” razam. Praŭda, nia ŭsie jany zdolnyja lotać. Siarod “latajučych” jość i 4 “cichija” samaloty Tu-154m. “Šumnyja” mašyny taksama nia buduć stajać biaz pracy. Na ich biełarusy buduć lotać u krainy za miežami Eŭraźviazu, pryčym nie abaviazkova ŭ Tadžykistan i Burkina-Faso. Naprykład, u Polšču, jakaja darma što źjaŭlajecca kandydatkaj na ŭstupleńnie ŭ EZ, ale abmiežavańniaŭ pa samalotnaj šumnaści pakul nie ŭviała.
Praviły Eŭraźviazu padryvajuć rasiejski i ŭkrainski samalotny biznes, bo chto ž kupić ich techniku, kali na joj nielha nikudy palacieć.
U źviazku z hetym paŭstaje pytańnie, jakija samaloty kuplać
(ci najmać) nam i ci varta nabyvać/arandavać rasiejskija mašyny. Toje, što samalotny park krainy treba abnaŭlać, nie asprečvaje nichto.
U kalaŭradavych kołach chodziać čutki, što Biełaruś niehałosna abaviazałasia kuplać samaloty tolki ŭ Maskovii, ale pradstaŭnik “Biełavija” abviarhaje hetuju infarmacyju. Jon kaža, što my nie kuplajem rasiejskuju techniku apošnim časam i, naahuł, kuplać rasiejskija mašyny nam nie vypadaje ŭžo chacia b tamu, što jany niazručnyja dla nas z punktu hledžańnia ŭmiaščalnaści, bo raźličanyja na zanadta vialikuju, jak dla nas, kolkaść pasažyraŭ. Ciapier “Biełavija” razhladaje mahčymaść uziaćcia samalotaŭ u lizynh u eŭrapiejskich krainach (pierš za ŭsio nazyvajuć Vialikuju Brytaniju), ale kankretnych pahadnieńniaŭ jašče nie dasiahnuta.
Jazapat Zmysła
Ciapier čytajuć
Pamiatajecie byłoha pamiežnika, jaki staŭ dalnabojščykam i ŭ Hiermanii pryznavaŭsia ŭ lubovi da Łukašenki? Ź im biada17
Kamientary