Z usioj krainy

Z usioj krainy

Najlepšy pradprymalnik

Na Miadzielščynie vyznačyli najlepšaha pradprymalnika. Im staŭ Leanid Dzieviałtoŭski z Kryvičoŭ. U miastečku jon maje kramu i pastajanna dapamahaje miascovamu dziciačamu sadku. Aproč jahonaj, u miastečku jość jašče dźvie pryvatnyja kramy. Adnu trymajuć braty Stankievičy, druhuju — Asanovič.

Siarhiej Źviaruha, Miadzieł

Niama čym płacić za kroŭ

Z 4 sakavika ŭ adździaleńni pieralivańnia kryvi Horackaje bolnicy pierastali prymać kroŭ u donaraŭ-navičkoŭ, prapanujučy patelefanavać u traŭni abo zdavać kroŭ biaspłatna. Niama hrošaj. Raniej tut prymali kroŭ u dvaccaci čałaviek na dzień, ale ciapier materyjalnuju kampensacyju ŭ 19,5 tys. rubloŭ harantujuć tolki dziesiaci donaram. Za pieršyja dva miesiacy hetaha hodu kroŭ zdali 280 čałaviek, i rajonnamu biudžetu heta abyšłosia bolš čym u piać z pałovaj miljonaŭ rubloŭ. Daktary prapanujuć rodnym chvorych, jakim nieabchodna pieralivańnie, achviaravać kroŭ za 4500 rubloŭ na ŭzmocnienaje charčavańnie. U Horkach 348 čałaviek stała zdajuć kroŭ ad 2 da 5 razoŭ na hod, 40 ź ich majuć zvańnie hanarovych donaraŭ. Ale navički ŭ hanarovyja donary nie imknucca. Usie jak adzin kažuć, što, jak tolki pačnuć zarablać hrošy, bolš siudy nikoli nia pryjduć.

Natalla Kirajenkava, Horki

Biarozavyja hrošy

U Kobryni niekatoryja sprytnyja hramadzianie zarablajuć tym, što pradajuć achvočym biarozavy sok pa 4 tys. rubloŭ za 40-litrovuju flahu. Hetyja zdabytčyki navat nie paśpiavajuć razvozić flahi pa horadzie — hetulki zamovaŭ.

Nastaŭniki j vučni

Supracoŭniki Kobrynskaha RUUS zatrymali niepaŭnaletniaha junaka, jakoha padazrajuć u kradziažy 8700 dalaraŭ i 40 tys. biełaruskich rubloŭ z domu jahonaj nastaŭnicy, žycharki vioski Hajkoŭka.

Pracujuć VIČ-infikavanyja prastytutki

Pavodle aficyjnaje infarmacyi, na Bieraściejščynie prastytucyjaj zajmajucca niekalki socień kabietaŭ. 341 žančyna (110 ź ich — bieraściejki) staić na ŭliku ŭ milicyi. U Bieraści pracujuć 3 VIČ-infikavanyja prastytutki. Viadoma, klijentaŭ jany ab hetym nie papiaredžvajuć.

Dla hurmanaŭ

Na Biarozaŭskim miasakanservavym kambinacie raspracavali novyja sasiski “Hurman”, admietnaść jakich u tym, što jany vyrablajucca z adnaho tolki miasa, bieź nijakich dabavak.

I.Chviedarovič, Bieraście

Biaspłatnych lekaŭ nia stała

Invalidy, pensijanery, veterany, “aŭhancy” i “likvidatary”, što žyvuć u Śvietłahorsku, z 6 sakavika pierastali atrymlivać biaspłatnyja leki. Terytaryjalnaje medyčnaje abjadnańnie Śvietłahorskaha rajonu vinavataje aptecy vialikija hrošy, a płacić niama čym. Lekaram zahadana vypisvać ilhotnyja recepty tolki chvorym na rak, cukrovy dyjabet, astmu, epilepsiju dy šyzafreniju — tym, chto biaź lekaŭ prosta zahinie abo narobić šmat biady. Astatnija ciapier musiać kuplać leki pa poŭnaj canie.

Vadzim Bołbas, Śvietłahorsk

Drevy ci hazapravod

U vajskovym avijaharadku ŭ Baranavičach adbyŭsia stychijny mitynh u abaronu drevaŭ. Žycharka adnaho z damoŭ, ubačyŭšy, jak rabotniki ŽKH siakuć arabiny, jakija jana niekali sama sadziła, vyskačyła na dvor i narabiła hvałtu. Źbiehlisia žychary navakolnych damoŭ i spynili źniščeńnie drevaŭ. Specyjalisty ŽKH kažuć, što ŭziacca za siakiery im zahadali ŭ harhazie: karani drevaŭ i kustoŭ daraśli da hazapravodu dy mohuć jaho paškodzić.

Zabiŭsia čałaviek

Z akna 4-ha pavierchu Lachavickaj rajonnaj bolnicy vyvaliŭsia čałaviek. Pacyjent terapeŭtyčnaha adździaleńnia 1930 h.n. ź vioski Vialikaja Łatva, daŭšysia vobziem, pamior na miescy. Daktary kažuć, što jon užo doŭhi čas mieŭ nervovuju chvarobu.

Rusłan Raviaka, Baranavičy

Biełaruskamoŭnyja jabłyki

Na maładziečanskim praduktovym rynku tolki ŭ adnym miescy — u pałatcy Taciany Kanabratkinaj — usie cetliki na biełaruskaj movie. Dyj sama žančyna razmaŭlaje tolki pa-biełarusku. “Biełaruskamoŭnyja” jabłyki karystajucca popytam u pakupnikoŭ, jak, zrešty, i inšaja sadavina dy aharodnina. A “razynki” časam vyklikajuć pytańni...

Ciažkaści z abutkam

U Biełarusi niepažadana mieć nohi “niestandartnych” (zavialikich albo zamałych) pamieraŭ. Tak, Radzivon Karpovič z Maładziečna marna šukaŭ zimovy abutak 50-ha pamieru jak u svaim horadzie, tak i ŭ stalicy. Urešcie znajomaja pryviezła jamu boty ź Niamieččyny, choć i tam daviałosia rabić specyjalny zakaz u horadzie Taŭrynf, dzie jość krama vialikaha abutku. Boty hišpanskaha pachodžańnia kaštavali 170 eŭra (kala 260 tys. rub.).

“Rehijanalnaja hazieta”

Rabicie staŭki, panovie

Pieršaja bukmejkierskaja kantora “Hulec” adčyniłasia ŭ Voršy. Minimalnaja staŭka na spartovyja padziei składaje 2 tys. rubloŭ. Samy vialiki vyjhryš pakul — 13 tysiačaŭ.

Viktar Lutynski, Vorša

Traktaryzacyja

Žychary Čerykaŭščyny na siońnia majuć 12 traktaroŭ “T-40”, 53 — “MTZ-82-82”, 32 – “T-25”, 31 traktar “T-16” dy 16 samarobnych traktaroŭ. I heta — biez uliku fermerskich haspadarak. Takoj kolkaści techniki chapiła b na 9 siońniašnich kałhasaŭ rajonu.

“Zaklik Iljiča”, Čerykaŭ

Miadzielščyna bahacieje

Na Miadzielščynie majecca ažno tysiača ŭładalnikaŭ plastykavych kartak “Biełarusbanku”. Heta bolej, čym u inšych rajonach Mienskaj vobłaści. Ułady miarkujuć pastavić jašče dva terminały — u Miadziele i ŭ Kupie.

“Rehijanalnaja hazieta”

Źnikli try vioski

Na Prapojščynie pamienieła na try vioski. Ludzi tam nie žyvuć užo daŭno, i voś ciapier rajvykankam aficyjna ich “skasavaŭ”. Adhetul vioski Bachań, Rabinaŭka i Traśliŭka nia buduć paznačacca na mapach.

“Leninskaje słova”, Prapojsk

futboł

U ambitnaj hrupie

28 cakavika kančatkova akreślilisia adboračnyja hrupy na čempijanat Eŭropy pa futbole. Usiaho stvorana 10 hrupaŭ pa 5 kamandaŭ. Finał čempijanatu Eŭropy 2004 h. projdzie ad 12 červienia da 4 lipienia ŭ Partuhalii. U im voźmuć udzieł 16 zbornych: Partuhalija pa pravie haspadara, 10 pieramožcaŭ adboračnych hrupaŭ dy 5 pieramožcaŭ sutykavych hulniaŭ pamiž druhimi kamandami hrupaŭ (hetyja hulni zaplanavanyja na 15—16 i 18—19 listapada 2003 h.).

U “našaj” hrupie, badaj, samaja vialikaja kancentracyja ambicyjaŭ dy nierealizavanych pamknieńniaŭ (adrazu čatyry ŭdzielniki spynilisia za krok ad čempijanatu śvietu—2002). My sioleta ŭvosień majem try hulni: 7 vieraśnia ŭ haścioch z Halandyjaj, 12 kastryčnika doma z Aŭstryjaj, 16 kastryčnika ŭ haścioch z Čechijaj. Našyja trenery kažuć, što pieršuju j apošniuju sustrečy lepš było b pravieści doma, a atrymałasia jakraz naadvarot. A ŭ apošnim tury našaja kamanda budzie svabodnaj ad hulniaŭ (u hrupie piać kamandaŭ, i ŭ kožnym tury niechta musić adpačyvać).

Takim čynam, našaja zadača-minimum — zaniać druhoje miesca ŭ hrupie. Choć bolš realnaj vyhladała b farmuloŭka “pazmahacca za druhoje miesca”. Cikava paraŭnać, jakaja hrupa “ciažejšaja” — taja, što była ŭ nas u papiarednim adboračnym cykle, ci taja, jakaja dastałasia hetym razam. Padstavaj dla takoha paraŭnańnia mohuć pasłužyć vyniki tavaryskich matčaŭ, što adbylisia ŭ Eŭropie 27 sakavika.

Našyja byłyja supierniki ŭ čatyroch sustrečach dva razy prajhrali i dva razy zhulali ŭničyju (2 punkty, roźnica miačoŭ 1—6). Ciapierašnija — mieli dźvie pieramohi, ničyju i paražeńnie (7 punktaŭ, miačy 3—2). Niekatoryja vyniki matčaŭ byłych supiernikaŭ prosta sensacyjnyja. Polšča prajhrała doma... Japonii (0:2), a Ŭkraina była razhromlenaja ŭ Rumynii (1:4, paśla pieršych 36 chvilinaŭ u hulni — 0:4). Praŭda, za Ŭkrainu nie hulaŭ Šaŭčenka.

Ciapierašnija supierniki prademanstravali peŭnyja prablemy ŭ atacy. Tak, Čechija zhulała ŭ haścioch z valijcami 0:0, a halandcy doma vyjhrali ŭ Hišpanii ŭsiaho hoł — 1:0 (adnak biaz van Nistełroja i Berhkampa). Estonija vyjhrała ŭ Rasiei 2:1 (abodva hały zabiŭ Oper, jaki hady dva tamu “prajšoŭsia” i pa biełaruskaj zbornaj), Partuhalija doma prajhrała Finlandyi 1:4.

Toj dzień byŭ admysłova vydzieleny ŭ eŭrapiejskim futbolnym kalendary dla tavaryskich hulniaŭ nacyjanalnych kamandaŭ. Z hetaj mahčymaści skarystali ažno 43 eŭrapiejskija zbornyja — adnak nia my. Kažuć, što hetak adhukajecca naša admova zhulać tavaryskuju hulniu z partuhalcami ŭ žniŭni minułaha hodu. A mo pryčyna jašče bolš banalnaja: pakul što niama ŭ nas kamandy, zdolnaj zhulać prystojna, na ŭzroŭni minułaha cykłu. Tym časam da pačatku novaha — usiaho piać miesiacaŭ.

A.U.