Futboł i sabačaje miasa (Čempijanat śvietu nia budzie nahadvać nivodzin z papiarednich)

Futboł i sabačaje miasa

Čempijanat śvietu nia budzie nahadvać nivodzin z papiarednich

Mundyjal jašče nie startavaŭ, ale ŭžo vyznačaje novyja hastranamičnyja standarty. Paŭdniovakarejskija restaracyi pierad hałoŭnym stadyjonam u Seule prapanujuć biaspłatna pakaštavać ulubionuju nacyjanalnuju stravu karejcaŭ — sabačaje miasa. Inšyja buduć handlavać sabačymi bifšteksami, nadzvyčaj papularnym u Karei pikantnym hulašom z sabačaha miasa (bošyntanh) i hot-dohami, jakija tut całkam apraŭdvajuć svaju nazvu.

Japonskija firmy, jakija zaŭždy aperatyŭna reahujuć na patreby rynku, reklamujuć tavary, źviazanyja z čempijanatam, — ad kresłaŭ u vyhladzie futbolnaha miača da kamplektaŭ bializny pad nazvaj “chiet-tryk”, što ŭ takijskich univermahach kaštujuć usiaho 17 tysiačaŭ jenaŭ (130 dalaraŭ). Užo adno heta vyłučaje spabornictvy na fonie papiarednich.

Upieršyniu čempijanat projdzie ŭ Azii. Heta šaniec dla Japonii i Karei davieści, što jany mohuć kankuravać z Zachadam — kali nie na poli, dyk, prynamsi, u arhanizacyi adnaho z samych viadomych i papularnych vidoviščaŭ.

Upieršyniu FIFA vybrała dvuch suarhanizataraŭ. Kiraŭniki federacyi namahajucca luboj canoj uźniać prestyž futbołu na samym hustanasielenym kantynencie śvietu. Ciažka znajści inšuju takuju paru, jak Kareja i Japonija. Ichnaje histaryčnaje supiernictva, kali nie skazać varožaść, siahaje daloka ŭ minułaje, da časoŭ akupacyi Japonijaj Karejskaha paŭvostravu ŭ 1905 h. Japoncy syšli adtul tolki ŭ 1945 h. Apošnim časam urady abiedźviuch krainaŭ rabili ŭsio dziela palapšeńnia ŭzajemnych stasunkaŭ, japonskaja imperatarskaja siamja navat pryznałasia ŭ svaich karejskich karaniach. Adnak pad maskaj tavaryskaści chavajucca napružańnie i niaspłačanyja viekavyja rachunki.

— U maładych niama takoha ahresiŭnaha staŭleńnia da karejcaŭ, jak u starejšaha pakaleńnia, — havoryć Cutomu Sudzuki, takijski analityk technalahičnaje haliny. — Ale adčuvajecca supiernictva. My nia chočam adstać ad ich.

Nia choča hetaha i Kareja. Jana investavała 2 młrd. dalaraŭ — stolki ž, kolki i Japonija, — u budaŭnictva stadyjonaŭ, srodki biaśpieki i h.d., choć paŭdniovakarejski hadavy abjom VUP (765 młrd. dalaraŭ) u čatyry razy mienšy za japonski. Karejcy ličać, što nie sastupiać svaim naparnikam i na futbolnym poli. Abiedźvie kamandy nia majuć šancaŭ sutyknucca adna z adnoj — chiba što cudam dabiarucca da finału. Karejcy zmahajucca za kubak śvietu ŭžo šosty raz. Dahetul jany nie zdabyli nivodnaj pieramohi. Miarkujučy, adnak, pa uzroŭni ichnaj padrychtoŭki, svaju prahu jany mohuć zadavolić užo 4 červienia ŭ matčy z Polščaj ci 10 červienia ŭ sustrečy z ZŠA.

Najbolš zaŭziata haspadary čempijanatu buduć zmahacca za toje, kab spadabacca haściam. I tut u karejcaŭ jość šaniec na biassprečnuju pieramohu. Bolšaść karejskich taksovak abstalavanaja sučasnaj systemaj dystancyjnaha pierakładu: pasažyr padčas jazdy moža čuć, naprykład, pa-anhielsku raskaz pra miaściny, jakija minaje. Japonija sustrakaje svaich haściej bolš naściarožana. Pa telebačańni hadzinami apaviadajuć, jak dobra padrychtavanaja japonskaja palicyja da nabiehu natoŭpaŭ pjanych zaŭziataraŭ z Eŭropy.

Hety čempijanat — pieršaje spartovaje mierapryjemstva suśvietnaha maštabu paśla 11 vieraśnia: u zimovych Alimpijskich hulniach u Sołt-Łejk-Syty brała ŭdzieł niašmat spartoŭcaŭ ź Blizkaha Ŭschodu ci Łacinskaj Ameryki. Futboł robicca sapraŭdnym sportam XXI stahodździa: i kalumbijcy, i halandcy śvietu nia buduć bačyć za televizaram u časie čempijanatu, choć ichnyja kamandy “adsiejalisia” na kvalifikacyjnych spabornictvach. Ale hlabalnaja papularnaść futbołu ciahnie za saboj i vielizarnuju adkaznaść dla słužbaŭ biaśpieki. 1 červienia vyhlad dvaccacihadovaha araba na vulicach Sapara nikoha nie pavinien dzivić: uviečary futbalisty Saudaŭskaj Aravii sustrakajucca z kamandaj Niamieččyny. Japonskim palicyjantam u toj dzień varta budzie pilniej sačyć za hurmami nieabyjakavych da sportu skinchiedaŭ, a nie za ludźmi, padobnymi da Muchamada Aty.

Ułady Paŭdniovaj Karei taksama nie zabyvajucca na miery biaśpieki padčas čempijanatu. A jany biesprecedentnyja. Kala stadyjonaŭ raźmieściać rakiety “ziamla-pavietra”, kab adbić pry patrebie terarystyčnyja ataki. Pobač buduć znachodzicca i hruzaviki z aparaturaj, zdolnaj zafiksavać najaŭnaść bijachimičnych rečyvaŭ — na vypadak mahčymaj chimičnaj ataki.

Siarhiej Rak