Baćka bačyć siabie Baćkam nacyi

Idealohija nacyjanalistyčnaha papulizmu

Łukašenka zahavaryŭ pra svaju novuju ambicyju, hetki vianok svajoj palityčnaj karjery. Ciapier jon choča być nia prosta vybranym chaj sabie na dziesiać terminaŭ prezydentam. Ciapier jon razhladaje svajo prezydenctva najpierš jak sposab zakłaści doŭhatryvałyja palityčnyja tradycyi, jakija pieražyvuć jaho. A kab uviekaviečyć svajo imia na stahodździ, treba dać niepierasiahalnyja ŭzory realnaj palityki i palityčnaha myśleńnia.

U pošuku «idealahičnych asnovaŭ suverennaj niezaležnaj dziaržavy» Alaksandar Łukašenka zrabiŭ ekskurs u historyju, da Vialikaha Kniastva Litoŭskaha, Biełaruskaj Narodnaj Respubliki i, narešcie, da BSSR, ad jakoj, pavodle jahonych słovaŭ, i pačynajecca tradycyja našaj dziaržaŭnaści. Jon doŭha i padrabiazna krytykavaŭ biełaruski nacyjanalizm i nacyjanalistaŭ za toje, što jany pravodziać padzieły ŭ hramadztvie pavodle nacyjanalnaj i moŭnaj adznaki, kab paśla pierajści da maštabu ŭsiaho śvietu j razhledzieć try hlabalnyja idealohii — marksizm, kanservatyzm i liberalizm (marksizm i kanservatyzm u jaho razumieńni blizkija biełaruskaj dušy, a liberalizm — biaskonca daloki).

Rasija, na dumku Łukašenki, pierastaje być kulturnym i duchoŭnym uzoram, a taksama technalahičnaj i ekanamičnaj mahutnaściu. Vinavatymi ŭ hetym pryznajucca ekanamičnyja reformy apošniaha dziasiatka hadoŭ, kali źjavilisia syravinavyja aliharchi, što niespraviadliva vykarystali nacyjanalnyja rasijskija bahaćci. Rezkaja acenka dajecca Rasii i ŭ suviazi ź jaje padryŭnoj infarmacyjnaj aktyŭnaściu, jakaja pieraškadžaje dasiahnieńniu palityčnaj stabilnaści ŭ krainie.

Nacyjanalizmu adradžencaŭ pieršaj pałovy 90-ch hadoŭ XX st. Łukašenka supraćstaŭlaje ŭłasny nacyjanalizm. Praŭda, u Łukašenkavaj pramovie šmat palityčnaje bałbatni, jakaja nadaje joj eklektyčnaści i zasłaniaje hety nacyjanalistyčny patas. Da taho ž, jana vielmi nieadnarodnaja. Častku, našpihanavanuju suchimi navukovymi farmuloŭkami, vidać, pisaŭ niechta nakštałt akademika Babosava, u raździele pra ŚMI adčuvajecca ruka redaktara Jakuboviča, a ŭ farmuloŭkach pra Biełaruś jak duchoŭnuju liderku ŭschodnieeŭrapiejskaj cyvilizacyi ŭhadvajecca styl Eduarda Skobieleva.

Peŭnuju častku pramovy składajuć spantannyja vykazvańni samoha Łukašenki, jakija rujnujuć stereatyp pra jaho jak «vaabšče nienarmalnaha kałchoźnika». Łukašenka, pa ŭłasnym pryznańni, hladzić «CNN», «Euronews» i «BBC», čytaje «Ruchnamu» Saparmurata Nijazava ŭ pierakładzie na biełaruskuju movu, słuchaje skandalnuju rasijskuju pop-hrupu «Tatu» i vysoka aceńvaje vajackija zdolnaści čačenskich separatystaŭ.

Sam fakt revizii dziaržaŭnaj idealohii pakazvaje, što na samym palityčnym viersie zrazumieli: idealohija sacyjalnaha papulizmu, pad ściaham jakoj Łukašenka pramaršavaŭ pieršuju piacihodku svajoj prezydentury, adpracavała svajo. Ale na źmienu sacyjalnamu papulizmu idzie idealohija, tryvałaść jakoj budzić nia mienšyja pytańni, — jaje možna vyznačyć jak nacyjanalistyčny papulizm. Jon budujecca z krutoj sumiesi asobnych elementaŭ klasyčnaj nacyjanalistyčnaj daktryny, kalanijalnych kulturnych kompleksaŭ i tradycyjnych vartaściaŭ patryjarchalnaha hramadztva. Kolki času ŭ hałovach vyšejšych uradoŭcaŭ zmoža mirna suisnavać nacyjanalistyčny mit pra histaryčnuju abranaść biełaruskaj nacyi z publičnymi kpinami ź biełaruskaj movy, skazać ciapier nia ŭ stanie nichto. Ale niama sumnievu, što j hetuju pačvarnuju miašanku raniej ci paźniej čakaje pierahlad.

Hałoŭnaje ž, asučaśnivańnie dziaržaŭnaj idealohii — vyrazny znak, što pakul Łukašenka ni z kim nie źbirajecca dzialicca svajoj uładaj.

Śpis častaty ŭžyvańnia słovaŭ u dakładzie A.Łukašenki «Mocnaja i kvitniejučaja Biełaruś musić mieć idealahičny fundament».

idealohija 195, dziaržava 157, praca 93, biełarus~y (naz.)/~ki (prym.) 90, ja 76, narod 52, Biełaruś 39, za 39, kraina 32, hramadz~tva/~dzki 30, prezydent 24, sajuz 24, moładź/małady 24, kultura 22, śviet 21, ekanomika 19, palityka 18, Zachad 18, respublika 17, Rasieja 17, liberalizm 16, nacyjanalny 15, padtrymka 13, Irak 13, Ameryka 12, suprać 10, niezaležnaść, niezaležny 11, kamunizm 9, apazycyja 9, nacyjanalizm 8, kanservatyzm 8, uschod 8, śvietapohlad 7, urad 6, vybary 6, marksizm-leninizm 5, kiraŭnik dziaržavy 5, ZŠA 5, rasiejec 4, siabar 4, minułaje 4, Eŭropa 3, Łukašenka 3, Maskva 2, Buš 2, budučynia 2, referendum 2, marksizm 2, rynkavy 1, adzinstva 1, vorah 1.

Artykuł Valera Bułhakava «Novaja redakcyja łukašenkaŭskaj idealohii» całkam budzie nadrukavany ŭ krasavickim numary časopisu «Arche»

• 0
• 0
• 0
• 0
• 0
• 0
• 0
• 0