Siłavaja i rezkaja

Biełaruskaja maniera vystupać u Kubku Devisa.

Uładzimier Vaŭčkoŭ i Maksim Mirny debiutavali ŭ Kubku Devisa 16—17-hadovymi junijorami na kortach śpiakotnaha Kot dJIvuaru ŭ 1994 h. Spatrebiłasia 10 hadoŭ i chutkasnaje pakryćcio «Taraflex» mienskaha manežu, jakoje najlepšym čynam adpaviadaje ich maniery hulni, kab biełaruskaja kamanda vyjšła ŭ paŭfinał Kubka.

103 hady tamu student Harvardzkaha ŭniversytetu Ŭajt Devis naładziŭ u Bostanie pieršy rozyhryš kamandnaha turniru, udzieł u jakim uziali tolki dźvie zbornyja — ZŠA i Brytanii. Siońnia «srebnuju sałatnicu» Kubka Devisa, nieaficyjnaha kamandnaha pieršynstva śvietu pa tenisie, asprečvajuć paŭtary sotni kamandaŭ z usich kantynentaŭ.

Debiut biełaruskaj kamandy ŭ Kubku adbyŭsia 10 hadoŭ tamu. Tady ŭ Kot-dJIvuary pry 30-hradusnaj śpiakocie biełarusy atrymali pieršuju pieramohu (nad Alžyram) — 2:1. Praz šeść hadoŭ biełarusy ŭpieršyniu zmahalisia za prava patrapić u lik najmacniejšych kamand planety. I dva razy zapar spynialisia za krok ad Suśvietnaj hrupy, sastupiŭšy na čužych hruntavych placoŭkach kamandam Arhientyny i Švajcaryi — abodva razy ź likam 0:5.

Maks Mirny

Dva dziesiacihodździ tamu baćka Maksima Mikałaj Mirny pryvioŭ syna ŭ tenisnuju sekcyju MAZu da trenera Arkadzia Ejdielmana. Na pačatku 90-ch nastaŭnik, jaki zrabiŭ suśvietna viadomaj Natallu Źvieravu, źjechaŭ za akijan i zabraŭ Mirnaha z saboj. Dalej spravu ŭ svaje ruki ŭziaŭ baćka. Jon uładkavaŭ syna ŭ znakamituju tenisnuju akademiju Nika Balećjery, što ŭ Fłorydzie. Razam ź Mirnym asnovy majsterstva tam spaścihała i rasiejka Hanna Kurnikava.

U 1998 h. Maksim dasiahnuŭ pieršaha pośpiechu, zdabyŭšy pieramohu ŭ mikście z amerykankaj Serenaj Uiljams adrazu ŭ dvuch turnirach «Vialikaha šlemu» — Uimbłdonskim i Adkrytym čempijanacie ZŠA. Za hod biełarus zrabiŭ fantastyčny praryŭ napierad, pieraskočyŭšy z 275-j na 75-ju pazycyju ŭ suśvietnym tabeli ab ranhach!

U 2000 h. Maksim znoŭku zrabiŭsia pieramožcam «US Open», hetym razam u bolš prestyžnym mužčynskim parnym razradzie z maładym aŭstralijcam Łejtanam Chjuitam, jaki doŭhi čas budzie ŭznačalvać śpis najmacniejšych tenisistaŭ śvietu.

U asabistym razradzie Mirny stvaryŭ supersensacyju ŭvosień 2001 h. u niamieckim Štutharcie, paśladoŭna «pakłaŭšy» čatyroch pieramožcaŭ turniraŭ «Vialikaha šlema» — charvata Horana Ivanišaviča, amerykanca Pita Samprasa, brazylca Hustava Kuertena dy rasiejca Jaŭhiena Kafielnikava. Takoha 125-hadovaja historyja suśvietnaha tenisu jašče nia viedała!

Ciapier Mirny pa mianušcy «Źvier» u asabistym razradzie klasyfikacyi Asacyjacyi tenisistaŭ-prafesijanałaŭ (ATP) uvachodzić u lik 40 najlepšych. A ŭ parnym — daŭno nie apuskajecca nižej za treciaje miesca.

U svaje 26 hadoŭ Mirny źjaŭlajecca adnym z najbolš bahatych biełarusaŭ. Pavodle źviestak ATP, za svaju karjeru jon zarabiŭ kala 4,5 młn dalaraŭ. Try hady tamu Mirnyja (Maks, a taksama jahony baćka i menedžer u adnoj asobie) nabyli dom u Brendentanie (štat Fłoryda, ZŠA), dzie i baviać bolšuju častku hodu.

Uładzimier Vaŭčkoŭ

Uładzimier Vaŭčkoŭ — taksama MAZaviec. Vielizarnuju rolu ŭ jahonym tenisnym losie adyhrali Viačasłaŭ Konikaŭ (pieršy trener) i Siarhiej Leaniuk. U siamji apošniaha Vaŭčkoŭ žyŭ i treniravaŭsia ŭ Amerycy na praciahu dvuch hod. A paśla toj samy Leaniuk, jaki atabaryŭsia ŭ Rasiei i zaniaŭ vysokuju pazycyju ŭ tamtejšych tenisnych kołach, usialak dapamahaŭ zdolnamu chłopcu. Dziakujučy Leaniuku Vałodziu ŭklučali ŭ asnoŭnuju častku «Kubka Kramla» i turniru ŭ Sankt-Pieciarburhu biez anijakaha adboru, choć pavodle svajho rejtynhu jon tudy i blizka nie prachodziŭ. Navat chadzili čutki, što Rasieja pakłała voka na Vaŭčkova. Ale čutki tak čutkami i zastalisia.

Pieršy značny pośpiech napatkaŭ Uładzimiera ŭ 1996 h., kali jon zrabiŭsia pieramožcam junijorskaha turniru Ŭimbłdonu. A ŭ 2000 h. na smarahdavych kortach londanskaha pieradmieścia dla Ŭładzimiera nastała zornaja hadzina. Raspačaŭšy baraćbu z kvalifikacyjnaha turniru, Vałodzia zdabyŭ vosiem pieramoh zapar i sastupiŭ tolki ŭ paŭfinale Pitu Samprasu. Pry hetym biełarus paŭtaryŭ rekord turniru, ustanoŭleny lehiendarnym Džonam Makinrojem u 1977-m.

Z taje pary, adnak, Vaŭčkoŭ adyšoŭ u cień. Jamu nia šenciła. Pad ciskam šmatlikich traŭmaŭ Uładzimier u rejtynhu ATP apuściŭsia ŭ druhuju sotniu. Ale ŭ hetym i jość fenomen Vaŭčkova: parazy ŭ asabistych turnirach nijakim čynam nie adbilisia na jahonych fantastyčnych vystupleńniach u Kubku Devisa, dzie pierad vačyma ziemlakoŭ jon demanstravaŭ nieparaŭnalny impet.

Doma i pakryćcio dapamahaje

Sezon-2003 biełaruskaja kamanda adkryła pieramohami nad zbornymi Izrailu, Zymbabve i Niamieččyny, što j vyvieła padnačalenych Siarhieja Ciacieryna ŭ Suśvietnuju hrupu.

Pryncypovaja lutaŭskaja sustreča miž Biełarusiaj i Rasiejaj musiła dać adkaz na pytańnie: ci nia byŭ vychad biełarusaŭ u elitu prostaj vypadkovaściu? Našy chłopcy daviali, što nie. Tamu da sustrečy z Arhientynaj była prykavanaja vializnaja ŭvaha. Na hulniu była akredytavanaja rekordnaja kolkaść žurnalistaŭ — 208, pryčym 11 ź ich prylacieli razam z arhientynskaj zbornaj.

Z udzielnikaŭ matču pamiž arhientyncami j biełarusami 2001 h. u Miensk prylacieŭ tolki Hiljerma Kańjas (23-je miesca ŭ rejtynhu ATP). Adnak jaho viartańnie nia stałasia dla arhientyncaŭ ščaślivym.

Startavyja šancy arhientynskaj kamandy rasceńvalisia jak značna vyšejšyja z taje pryčyny, što ŭ jaje składzie znachodzilisia adrazu dva tenisisty, jakija naležali da pieršaj dziasiatki suśvietnaha rejtynhu, — Hiljerma Koryja (4-y) i David Nałbandzian (8-y). Adnak pieršy byŭ vymušany adračysia ŭdziełu ŭ hulni z pryčyny mocnych bolaŭ u śpinie, a druhi tak i nie zalačyŭ traŭmy halonki. U vyniku mahčymaści padraŭnialisia. Pry hetym Vaŭčkoŭ i Mirny mieli vialiki plus: chutkasnaje pakryćcio «Taraflex» mienskaha manežu najlepšym čynam adpaviadaje ich siłavoj i rezkaj maniery hulni.

«Hałoŭnym čyńnikam našaha zvyšpaśpiachovaha vystupleńnia na Kubku Devisa liču chatni faktar, — adznačyŭ Maksim Mirny karespandentu «NN». — Vosiem hadoŭ my nie prajhrajom na svajoj placoŭcy ŭ Miensku».

Hetym razam Mirny i Vaŭčkoŭ zrabili spravu daterminova, nie prajhraŭšy ŭ pieršyja dva dni svaim supiernikam anivodnaha setu. Lider arhientyncaŭ Ahuścina Kaljery (13-je miesca ŭ rejtynh-śpisie ATP) za tydzień tak i nia zdoleŭ prystasavacca da rezkaha adskoku miača na chutkasnym pakryćci. Hiljerma Kańjas prylacieŭ u Biełaruś paźniej za ŭsich i nie paśpieŭ prajści aklimatyzacyju. U hetym śviatle vychad Kańjasa na pieršuju hulniu ź Mirnym vyhladaŭ statehičnaj pamyłkaj kapitana Łuza. Adzinym z arhientyncaŭ, chto akazaŭ choć jaki supraciŭ nacisku biełarusaŭ, byŭ 20-hadovy Chuan Manaka (vyjhraŭ adziny pieramožny dla arhientyncaŭ set u Vaŭčkova). Ale mahčymaść prajavić siabie vypała jamu tady, kali vynik hulni byŭ užo pradvyznačany.

5:0! Revanš atrymaŭsia.

«Hetaja pieramoha — naš padarunak u śviatočny vielikodny dzień usim biełaruskim ludziam!» — skazaŭ karespandentu «NN» Uładzimier Vaŭčkoŭ.

Bielorusso — collosal!

Spartovy žurnalist arhientynskaha «Radio-10» Chorchie Banatolji padzialiŭsia svaimi ŭražańniami ad Biełarusi: «Nidzie pabyvać nam nia vypała. Usio ž pracavać pryjechali, a nie pa vystaŭkach chadzić. Naviedali tolki muzej vajny. Davoli cikava. Praŭda, jašče cikaviej było nazirać za vašymi pryhažuniami. Jany navat lepšyja, čym u Rasiei. Što da samoje hulni, jaje vynik dla nas sapraŭdny šok. Bielorusso!… Collosal!»

A jašče našy arhientynskija kalehi nijak nie mahli zrazumieć, čamu ŭ druhi dzień matču natoŭp biełaruskich žurnalistaŭ sabraŭsia ŭ vestybiuli vakoł maładoj spadaryni z rašučym vyrazam tvaru. Nu jak im było rastłumačyć, što z pryčyny prysutnaści na hulni prezydenta krainy jahonaja pres-sakratarka Natalla Piatkievič zahadnym tonam infarmavała pra toje, što možna rabić, kudy chadzić…

Prybyćcio Alaksandra Łukašenki na hulniu čakałasia ŭ pieršy dzień, i ŭsim akredytavanym žurnalistam było prapanavana pryjści ŭ manež za paŭtary hadziny da pačatku hulni, bo paśla mielisia nikoha nie prapuskać. Ale prezydent na trybunach tak i nie źjaviŭsia. Jak nie źjaviłasia na svaich miescach jašče dobraja pałova hledačoŭ. Zatoje nastupnym dniom razam sa źjaŭleńniem pieršaj asoby ŭ zali zahučali barabany, była skaardynavanaja padtrymka, zastrakacieli čyrvona-zialonyja ściahi…

Darečy, taja hihanckaja praca, jakaja pryviała da cudoŭnaha pieratvareńnia futbolnaha pola ŭ tenisny stadyjon, abyšłasia, pavodle roznych acenak, u sumu ad troch da piaci miljonaŭ dalaraŭ.

* * *

Pieramoha biełaruskaj zbornaj nad piataj kamandaj śvietu ŭ čverćfinale Kubka Devisa ŭźniała ŭ krainie novuju chvalu tenisnaj papularnaści. Tolki vychad biełaruskich chakieistaŭ u paŭfinał Alimpijskich hulniaŭ'2002 u Sołt-Łejk-Syty možna paraŭnać z dasiahnieńniem ajčynnych majstroŭ vialikaj rakietki. Usio bolej dzietak vykazvajuć žadańnie zajmacca tenisam tolki dla taho, kab być padobnymi na svaich hierojaŭ — Mirnaha dy Vaŭčkova.

Na pres-kanferencyi Maksim Mirny adznačyŭ: «Ciapier našaj hałoŭnaj pieraškodaj zastajecca amerykanskaja zbornaja, ź jakoj my zhulajem paŭfinał 24—26 vieraśnia na ich placoŭcy. A finał u lubym vypadku budziem prymać na radzimie!»

Hetkija b słovy dy bohu ŭ vušy!

Kastuś Łaškievič

• 0
• 0
• 0
• 0
• 0
• 0
• 0
• 0