Zdaryłasia ci zdarycca?

AAN asudziła sytuacyju z pravami čałavieka ŭ Biełarusi. Pradstaŭnik Biełarusi ŭ Ženevie pakuje čamadany.

Hałoŭnaj padziejaj dla Biełarusi na minułym tydni možna ličyć nie maštabnyja voinskija vučeńni biełaruskaj armii, a toje, što Kamisija AAN pa pravach čałavieka na svaim pasiadžeńni ŭ Ženevie pryniała rezalucyju, u jakoj jašče na hod byŭ padoŭžany mandat specpradstaŭnika hetaj arhanizacyi ŭ Biełarusi Adryjana Sieviaryna. U hetaj rezalucyi była vykazana «zakłapočanaść u suviazi z datyčnaściu vyšejšaha kiraŭnictva Biełarusi da źniknieńnia troch pradstaŭnikoŭ apazycyi ŭ 1999 hodzie i adnaho žurnalista ŭ 2000».

U padtrymku hetaj rezalucyi, aŭtarami jakoj byli EZ i ZŠA, vykazalisia 23 krainy. Niepryjemnym siurpryzam dla Miensku stała toje, što siarod ich akazałasia Ŭkraina. A tyja, chto prahałasavaŭ suprać, — Rasieja i Kitaj — tak i nie zmahli praduchilić pryniaćcie hetaha dakumentu. 14 krain ustrymalisia ad hałasavańnia.

Kamisija AAN zapatrabavała ad biełaruskich uładaŭ dazvołu na ŭjezd u Biełaruś specpradstaŭnika kamisii. Hety pradstaŭnik pavinien uznačalić poŭnamaštabnaje raśśledavańnie advolnych aryštaŭ, pieraśledavańniaŭ pa palityčnych matyvach, katavańniaŭ i inšych parušeńniaŭ pravoŭ čałavieka, jakija, na dumku kamisii, za apošnija hady mieli miesca. Ale Adryjan Sieviaryn pa-raniejšamu budzie zastavacca dla aficyjnaha Miensku personaj non-hrata. A niekali ž, kali jon uznačalvaŭ pracoŭnuju hrupu pa Biełarusi Parlamenckaj asamblei ABSE i samu asambleju, z panam Sieviarynam asabista hutaryli Łukašenka, Łatypaŭ i niekatoryja inšyja. Jany tady abmiarkoŭvali ŭmovy, pry jakich Biełaruś pierastanie być «izhojem», i navat kankretnyja terminy vykanańnia hetych umoŭ. Naprykład, udaskanaleńnia Vybarčaha kodeksu.

U dačynieńni da Sieviaryna, kiraŭnika Kansultacyjna-naziralnaj hrupy ABSE ŭ Miensku pasła Vika i inšych udzielnikaŭ pracesu była ŭžytaja taktyka tak zvanych «demakratyčnych kalidoraŭ». Heta kali eŭračynoŭnikam «pudrylisia mazhi» ŭ niefarmalnaj abstanoŭcy pry spryjańni davieranych asob z «treciaha sektaru». Pomnicca, Łukašenka ŭsio-taki zmoh tady pierakanać Sieviaryna i astatnich u Eŭropie, što da vybaraŭ-2001 ničoha padpraŭlać u zakanadaŭstvie nia varta. Maŭlaŭ, potym… Važna było čas vyjhrać. I voś siońnia pany Sieviaryn, Vik užo ŭ stanoviščy person non-hrata ŭ Biełarusi. Jany biełaruskamu pravicielu bolš nie patrebny. Za hetyja hady režym uzmacniŭsia i hatovy da adkrytaha supraciŭleńnia i Zachadu, i Ŭschodu. Pra heta śviedčać i pavodziny ciapierašniaha pradstaŭnika Biełarusi ŭ Ženevie, jaki ŭžo pakuje čamadany dadomu. Čakajucca kadravyja źmieny ŭ MZS Biełarusi.

Pavodle słoŭ Pastajannaha pradstaŭnika Biełarusi ŭ Ženevie Siarhieja Alejnika, Miensk pa-raniejšamu budzie ihnaravać status specpradstaŭnika Kamisii AAN pa pravach čałavieka. Jon taksama adznačyŭ, što pakolki hetaja rezalucyja nosić nieabaviazkovy charaktar, dyk i pylicca joj na palicach archivu. I naahuł, pavodle słoŭ Alejnika, metaj taho, što adbyłosia, źjaŭlajecca «apraŭdańnie ŭmiašańnia va ŭnutranyja spravy suverennaj dziaržavy».

Biełaruski palitolah Viačasłaŭ Paźniak adznačaje, što sioletniaja treciaja pa liku rezalucyja pa Biełarusi nosić jašče bolš žorstki charaktar. Možna amal napeŭna čakać, miarkuje palitolah, što vosieńniu analahičnaja rezalucyja budzie ŭniesiena na razhlad Treciaha kamitetu Hieneralnaj Asamblei AAN (sacyjalnyja i humanitarnyja pytańni dy pytańni kultury). Biełaruski MZS raźličvaje na toje, što, jak i ŭ 2004 hodzie, jaje ŭdasca źniać z hałasavańnia ŭ Hienasamblei. Dla hetaha, vidać, znoŭ buduć vykarystany pracedurnyja mechanizmy, a taksama padtrymka delehacyj Rasiei i niekatorych inšych dziaržaŭ. Adnak navat padobny zychod nia ŭ stanie schavać fakty dalejšaha paharšeńnia sytuacyi z pravami i svabodami ŭ krainie, prablemy z vykanańniem mižnarodnych abaviazacielstvaŭ u hetaj sfery, u pryvatnaści, pierad AAN i ABSE, a taksama źviazanuju z hetym zaniepakojenaść mižnarodnaj supolnaści, što ŭsio narastaje.

A tym časam u Ženevie čakajecca źjaŭleńnie Siarhieja Martynava. Ale nia ŭ jakaści kiraŭnika biełaruskaha MZS. Jak viadoma, užo nia pieršy hod jon pracuje pa kantrakcie, jak pryvatnaja asoba, ekspertam u adnoj z kamisij AAN. U toj samaj, jakaja i pryniała takuju žorstkuju rezalucyju pa Biełarusi.

• 0
• 0
• 0
• 0
• 0
• 0
• 0
• 0