U Viciebsku budzie muzej Jana Paŭła II
Hetaja ideja ŭźnikła ŭ dni pachavańnia byłoha papy, tym bolej što Polski dom u Viciebsku — heta adzinaja ŭ Biełarusi ŭstanova, jakaja nosić imia Jana Paŭła II.
Pieršyja ekspanaty budučaha muzeju — knihi i aŭdyjozapisy — naviedniki Polskaha domu mahli ŭbačyć 2 traŭnia, kali pavodle katalickaje tradycyi jany sabralisia na tryccaty dzień pa śmierci Jana Paŭła II. Na žal, u Viciebsk na zaprašeńnie nia zmoh pryjechać Ryhor Baradulin, pierakładčyk zbornika vieršaŭ pantyfika na biełaruskuju movu. Ale tvory Jana Paŭła II usio adno prahučali — u vykanańni barda Alesia Kamockaha, jaki pakłaŭ ich na muzyku, i moładzi z katalickich parafij Viciebsku dy Šumilina.
Ušanavać pamiać Jana Paŭła II u Polskim domie sabralisia razam kataliki, hreka-kataliki, studenty tealahičnaha fakultetu Viciebskaha ŭniversytetu, miascovyja litaratary i mastaki. Kožny dzialiŭsia ŭražańniami ad sustreč ź Janam Paŭłam II u časie pilihrymak, šmat chto vykazvaŭ škadavańnie, što były papa tak i nie naviedaŭ Biełarusi, dzie jaho duža čakali.
«Mova — heta taksama dar Božy», — adznačyŭ u svaim vystupie piśmieńnik Franc Siŭko. Darečy, u Polskim domie ŭ časie paminalnaje imprezy amal usie vystupoŭcy havaryli pa-biełarusku. «My budziem źbirać materyjały, kab stvaryć tut muzej, — skazała kiraŭnica Polskaha domu Alicyja Hałustava. — Ale najpierš chaciełasia b, kab heta byŭ nie aficyjozny memaryjalny muzej Jana Paŭła II, a ŭtulny dom dla nas usich dziela jahonaje pamiaci».
AT, Viciebsk
￭
U niebie sinim naš rodny ściah
8 traŭnia ŭ Horadni vyrašyli adznačyć adrazu dva śviaty: Dzień pieramohi i Dzień dziaržaŭnaha ściaha i hierba.
Ludziej na płoščy Lenina sabrałosia šmat. U pracoŭnych kalektyvach i ŭstanovach udzielnikaŭ mitynhu pa staroj zaviadzioncy vyznačali «dobraachvotna» z abaviazkovaj harantyjaj čałavieka być na płoščy.
Uzdymali ściah lepšyja pavodle spabornictva pradpryjemstvaŭ i ŭstanovaŭ, veteran vajny, maładzion z BRSM. Staršynia harvykankamu raspavioŭ pra hierb z žyćciadajnymi kałaskami žyta, pra ekanamičnyja zdabytki horadu ŭ pieršym kvartale, a ŭdzielnica vajny vykazała spadziavańnie, što moładź budzie takoj ža, jak jany, pieramožcy 1945-ha. Adbyŭsia pryjom ŭ pijanierskuju arhanizacyju. Halštuki paviazali viadomyja ludzi horadu na čale z namieśnicaj staršyni abłvykankamu Maryjaj Birukovaj.
Śviatočny nastroj arhanizataram mitynhu papsavali kalarovyja baloniki i prymacavany da ich bieł-čyrvona-bieły štandar. Prysutnyja paviarnulisia śpinaj da prezydyjumu i ŭźniali hałovy. Vystupoŭca, nia bačačy nacyjanalnaha štandara, praciahvaŭ tłumačyć važnaść čyrvonaha i zialonaha koleraŭ, zakončyŭšy amal što paetyčna: «Łunaj u niebie sinim, naš rodny ściah...»
Voś heta i zastałosia ŭ pamiaci mitynhoŭcaŭ — nacyjanalny ściah u błakitnym niebie.
Milicyjanty kinulisia ŭ skver imia Žylibiera, adkul uźvilisia baloniki. Kažuć, arhvysnovy nie prymusiać doŭha čakać. Niechta ž nie dahledzieŭ.
Anton Łabovič, Horadnia
￭
Na traktary pa spraviadlivaść
Čynoŭniki ivacevickaha Domu savietaŭ ablapili ŭsie vokny, kab pahladzieć na niezvyčajnuju karcinu. Za niekalki metraŭ ad uvachodu ŭ hałoŭny budynak rajonu pobač z pomnikam U.Leninu laskacieŭ traktar «Biełarus» z prymacavanymi da kabiny čyrvonym siarpasta-małatkastym ściaham i transparantam, napisanym ad ruki: «Patrabuju rehistracyi MTZ».
Na taki krok žychara vioski Bycień Michaiła Hołuba pašturchnuli adčaj i biaśsille. U 2002 h. jon kupiŭ u sielhaskaaperatyvie «Pahorje» traktar, zapłaciŭšy za jaho kala dvuch miljonaŭ rubloŭ, adnak techpašpartu nie atrymaŭ. Nieadnarazovyja zvaroty da kiraŭnictva haspadarki nie dali nijakaha plonu. A milicyja tym časam štrafavała za toje, što jon ekspluatuje stalovaha kania, nia majučy na jaho nijakich dakumentaŭ.
Na sustreču z buntarom vyjšli v.a. staršyni rajvykankamu Anatol Tkačuk i jaho namieśnik Alaksandar Saroka. Jany ŭhavaryli traktarysta adahnać mašynu na aŭtastajanku i zajści da ich u kabinet. Paśla vyklikali da siabie kiraŭnikoŭ «Pahorja».
Incydent skončyŭsia tym, što Michaił Hołub na praciahu nastupnych troch dzion atrymaŭ techpašpart na traktar, što dazvoliła rajonnaj inspekcyi dziaržnahladu zarehistravać «MTZ-80» na novaha haspadara. Jamu zastałosia davieści traktar da ładu, kab prajści techahlad, atrymać numary na mašynu — i pracuj, uładalnik, spakojna.
Alaksandar Łaŭraniuk, Ivacevičy
￭
Kab nie kasili
Kastryčnicki sud horadu Viciebsk asudziŭ na dva hady pazbaŭleńnia voli pryzyŭnika, jaki doŭhi čas uchilaŭsia ad prachodžańnia vajskovaj słužby.
Łuniniec z Kubkam
Klub z Łunincu «Juna» staŭ uładalnikam Kubku Biełarusi pa matabole, pryśviečanym 60-m uhodkam Pieramohi. U finale palešuki vyjhrali ŭ «Azota» (Horadnia) — 3:0. Treciaje miesca zaniaŭ čempijon Biełarusi — pinski «Aŭtamabilist». Nastupny start biełaruskich motabalistaŭ — pry kancy miesiaca. Z 25 pa 29 traŭnia ŭ Niamieččynie projdzie čempijanat Eŭropy. Zbornaja Biełarusi pajedzie tudy favarytam, jany — dziejny čempijon kantynentu.
AH; BiełTA
∎
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty49
Kamientary