Зяленскі: На беларуска-расійскіх вучэннях будзе адпрацоўвацца сцэнар захопу Кіева і Адэсы
Пра гэта прэзідэнт Украіны Уладзімір Зяленскі сказаў у інтэрв'ю Agence France-Presse, Reuters ды Associated Press.
Пра вучэнні «Захад-2021» Зяленскі згадаў, адказваючы на пытанне замежных журналістаў аб прычынах вайсковай эскалацыі каля ўкраінскіх межаў вясной і настойванні Расіі на вядзенні прамых перамоваў Украіны з прадстаўнікамі так званых «народных рэспублік».
«Вяртаючыся да Расіі, яны кажуць: «Мы тут пры чым? Вы размаўляйце з гэтымі таварышамі з «ДНР/ЛНР». Тады пытанне: а «Захад-2021» [сумесныя вайсковыя вучэнні Расіі і Беларусі], вучэнні, якія вы будзеце весці — не ЛДНР, не АРДЛА, гэта ж вы [Расія] праводзіце. Тады скажыце мне, а чаму тут — па той інфармацыі, якую мы атрымліваем — адпрацоўваюцца варыянты магчымага захопу Кіева, Адэсы, Харкава? Проста здзіўляешся, як можна вось так казаць адно, а рабіць іншае», — сказаў Зяленскі.
— Цяпер сітуацыя больш-менш спакойная, як мы адсюль бачым. Не чакаеце нейкую эскалацыю у найбліжэйшы час? І калі?
— На вялікі жаль, мы павінны чакаць ускладненні і быць гатовымі да іх кожны дзень. Але я не лічу, што гэта будзе. Імавернасць правакацый ёсць, у прыватнасці, у сярэдзіне верасня, калі будзе «Захад-2021».
«І ўсё ж я лічу, што ў поўнамаштабнай вайне Расійская Федэрацыя не зацікаўленая», — дадаў Зяленскі.
Цяпер чытаюць
Дзяржаўныя сацыёлагі: Беларусы найперш звязваюць сваю дзяржаўнасць з Вялікім Княствам Літоўскім14
Каментары