У Літвы няма ніякіх чырвоных ліній у плане санкцый для Расіі, якая распачала вайну ва Украіне, кажа міністр замежных спраў Габрыэлюс Ландсбергіс, піша Delfi.lt.
Міністр сказаў гэта пасля сустрэчы ў Вільні з віцэ-прэм'ерам і кіраўніком дыпламатычнага ведамства Нідэрландаў Вопке Хукстра.
«У Літвы няма ніякіх чырвоных ліній, калі мы гаворым пра санкцыі. Гэта значыць, што мы гатовыя дыскутаваць аб любых санкцыях, уключаючы і энергетычныя», — сказаў Ландсбергіс. Ён падкрэсліў, што лепш за ўсё было б пачаць з нафтавага эмбарга з Расіі, бо гандаль нафтай прыносіць гэтай краіне вялікія паступленні ў бюджэт.
Па словах нідэрландскага міністра, Еўрасаюз павінен прыняць адзінае рашэнне ў плане адмовы ад энергарэсурсаў з Расіі. «Некаторыя краіны нашмат больш залежныя ад нафты і газу з Расіі, таму нам трэба знайсці адзіную пастанову», — сказаў Хукстра.
Каментары