Праўладны аналітык Шпакоўскі спрабуе патлумачыць, што хацеў Лукашэнка ад ЗША
«Падзеі, якія адбыліся, варта ўспрымаць абсалютна спакойна».
Праўладны аналітык Аляксандр Шпакоўскі выказаўся наконт вызвалення 14 палітвязняў, якое адбылося ў выніку візіту ў Мінск спецпрадстаўніка прэзідэнта ЗША Дональда Трампа Кіта Келога.
«Падзеі, якія адбыліся, варта ўспрымаць абсалютна спакойна. Кантакты рознага ўзроўню ажыццяўляліся досыць даўно, цяпер грамадства бачыць іх публічныя вынікі», — выступіў у тэлеграм-канале Шпакоўскі.
Што ад вызвалення палітвязняў і перадачы іх амерыканцам атрымаў Лукашэнка, праўладны аналітык апісвае абстрактна:
«Беларускі бок таксама мае шэраг мэтаў цалкам прагматычнага характару, якія павінны быць дасягнутыя з прычыны перамоваў з ЗША. Акрамя таго, ёсць яшчэ ўкраінская праблематыка, дзе, відавочна, павінны быць улічаныя беларускія інтарэсы ў рамках патэнцыйнага кампрамісу.
Пры гэтым у Мінску разумеюць, што ў Вашынгтона ёсць доўгатэрміновыя палітычныя амбіцыі, у тым ліку на кірунку нашай краіны. Не жадаючы канфрантацыі з Захадам і ў прыватнасці з ЗША, Беларусь тым не менш ні на ёту не мае намеру паступацца суверэнітэтам у галіне ўнутранай палітыкі і міжнароднымі абавязацельствамі ў дачыненні да саюзнікаў Мінска».
Сваіх паплечнікаў, якія баяцца выхаду праціўнікаў рэжыму на волю, Шпакоўскі супакойвае:
«Калі наша грамадства сапраўды з'яўляецца згуртаваным, арганізаваным, ідэйным, патрыятычныя СМІ накіроўваюць інфармацыйны парадак дня, а праваахоўны блок эфектыўна абараняе бяспеку дзяржавы, то мы нават не заўважым камарыных укусаў ад чарговых «збеглых», якія папоўнілі сонм зласлівых палітычных эмігрантаў».
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты12
Каментары