У Мінску кудысьці знік арт-аб'ект, прысвечаны беларускім айцішнікам
У Мінску знікла інсталяцыя арт-групы Hutkasmachnaa — шыльда IT-COUNTRY BIRTHPLACE на гаражы ў дворыку каля касцёла святога Роха. Гэта заўважылі самі мастакі і напісалі пра сітуацыю на сваёй старонцы ў фэйсбуку, піша CityDog.
«Здаецца, нашу фэйкавую таблічку выкралі галерысты. Але IT-краіна — гэта больш, чым проста кавалак дошкі, IT-краіна назаўжды ў кожным з нас», — сумна іранізуюць стрыт-артары.
Фэйкавая шыльда «IT-COUNTRY BIRTHPLACE» была прэзентаваная на персанальнай выставе стрыт-артараў 15 верасня 2020 года, а пазней размешчаная на адным з гаражоў на праспекце Незалежнасці, 44b/18, у дворыку каля касцёла святога Роха.
На шыльдзе на англійскай мове напісана, што гэты гараж — месца нараджэння ўсіх беларускіх IT-кампаній і ўнесены ў (неіснуючы) Нацыянальны рэестр гістарычных месцаў. У арт-аб'екта ёсць нават свая старонка на TripAdvisor у раздзеле «Гістарычныя славутасці. Культурныя аб'екты і славутасці. Загадкавыя месцы».
Дарэчы, мастакі прапануюць усім, хто хоць раз быў у гэтым месцы, пакінуць свой каментарый і вывесці старонку фэйкавай славутасці ў топ.
Мінская арт-група Hutkasmachna ўтварылася ў 2016 годзе і стала вядомая сваімі інсталяцыямі, якія вы, напэўна, не раз бачылі на вуліцах Мінска. Адна з іх — цягнік паміж карпусамі завода «Гарызонт» на вуліцы Куйбышава — дагэтуль на сваім месцы. Таксама мастакі расстаўлялі на Пуліхава чырвоныя парасоны, упрыгожвалі чаротам масток паміж Лошыцай і Серабранкай, вешалі люстэркі на Інтэрнацыянальнай, «топілі» надпіс Design (або Resign).
Практычна ўсе працы стрыт-артараў былі дэмантаваныя супрацоўнікамі мінскіх ЖЭС і іншых адказных інстанцый. Але з некаторымі інсталяцыямі былі асаблівыя гісторыі. Напрыклад, у пачатку верасня 2021 года ў сетцы бурна абмяркоўвалі, чаму зафарбавалі трамвай на сцяне былой галерэі «Ў» — яшчэ адзін са знакавых арт-аб'ектаў Hutkasmachnaа. Тады новы арандатар будынка, стваральнік моднага хаба Dandy Land Андрэй Пратапопаў патлумачыў гэта паўаварыйным станам сцяны і прыкметным выцвітаннем самога малюнка.
Дарэчы, аўтары стрыт-арта па-філасофску ставяцца да таго, што з іх аб'ектамі заўсёды нешта адбываецца. «Іх могуць знесці, разбурыць, куды-небудзь панесці або загарадзіць плотам — за гэтым заўсёды цікава назіраць, і да такіх зменаў я стаўлюся як да часткі гарадскога жыцця», — дзяліўся ў свой час адзін са стваральнікаў арт-групы Андрэй Бусел у вялікім інтэрв'ю для CityDog.io.
8 верасня мінулага года мастак Андрэй Бусел быў затрыманы сілавікамі і асуджаны на 13 сутак. Пра прычыны затрымання да гэтага часу нічога невядома. Пазней Андрэй з'ехаў з краіны.
Чытайце таксама:
Каментары
як сумна бачыць, як шэрасць змагаецца з яркімі мастакамі...