Акадэмікам Расійскай акадэміі навук абралі «кравасісю» часоў Януковіча
Былы прэм’ер-міністр Украіны Мікалай Азараў, які не мае ніводнай сучаснай навуковай работы, быў абраны акадэмікам Расійскай акадэміі навук (РАН). Паводле паведамленняў СМІ, за яго кандыдатуру прагаласавалі 527 акадэмікаў, супраць — 14, устрымаліся — 15.
Як паведамляецца, гэта беспрэцэдэнтны выпадак, бо ўпершыню акадэмікам стаў чалавек з нулявым індэксам Хірша, што азначае поўную адсутнасць цытавання ягоных работ у міжнародных навуковых базах Scopus і Web of Science.
У красавіку, паведамлялася, што вылучэнне Азарава падтрымала аддзяленне навук аб Зямлі РАН.
Прэс-служба РАН заявіла, што наяўнасць індэкса Хірша не з’яўляецца абавязковай умовай для абрання ў акадэмію — дастаткова падаць неабходны пакет дакументаў, а рашэнне прымае агульны сход акадэмікаў.
Мікалай Азараў — адзін з заснавальнікаў Партыі рэгіёнаў і блізкі паплечнік былога прэзідэнта Украіны Віктара Януковіча. Ён займаў пасаду прэм’ер-міністра Украіны з 2010 да 2014 года, але пасля падзей Еўрамайдану збег у Расію. На радзіме ён знаходзіцца ў вышуку па некалькіх крымінальных справах.
Як палітык сярод іншага праславіўся тым, што за чвэрць стагоддзя знаходжання на высокіх пасадах у незалежнай Украіне пры адзінай дзяржаўнай украінскай мове так і не здолеў гэтую мову засвоіць хоць бы на колькі-небудзь прымальным узроўні і меў цяжкасці нават з чытаннем украінскага тэксту з паперкі. Гэта асабліва выйшла наяў пасля прызначэння Азарава на пасаду прэм'ера, дзе зусім не карыстацца ўкраінскай мовай не было магчыма нават пры прэзідэнцтве Януковіча. Калечаная мова Азарава спарадзіла шмат жартаў і мемаў, у народзе яе называлі «азіраўкай». Сярод іншага, гэта словы «кравасісі» і «пісяны».
Да 2022 года Азараў быў членам-карэспандэнтам Нацыянальнай акадэміі навук Украіны, але быў выключаны пасля пачатку поўнамаштабнай вайны Расіі супраць Украіны.
У той жа час навуковая супольнасць РАН не падтрымала абрання ў акадэмікі двух сапраўдных навукоўцаў — лінгвіста Алены Беразовіч і дырэктара Інстытута рускай мовы Фёдара Успенскага, якія ў 2022 годзе падпісалі ліст супраць расійскай агрэсіі ва Украіне.
Беразовіч і Успенскаму выставілі патрабаванне «пакаяцца» за падпісанне ліста. Гэтага, у прыватнасці дабіваўся акадэмік Валерый Кашын, які сам стаў акадэмікам у 2022 годзе і, згодна з яго біяграфіяй на сайце РАН, «непасрэдна ўдзельнічаў» у распрацоўцы сістэм высокадакладнай зброі, у тым ліку ракетнага комплексу «Кінжал».
У выніку галасавання Расійская акадэмія навук не падтрымала кандыдатур Успенскага і Беразовіч у акадэмікі, нягледзячы на іх навуковыя заслугі.
Цяпер чытаюць
22‑гадовы Віктар з-пад Клецка пратрымаўся на фронце месяц. А пасля бацькі перасварыліся, дзелячы грабавыя14
Каментары