Дзевяць банкаў, што працуюць у Беларусі, паведамілі пра змяненні асобных правілаў абслугоўвання і надалі новыя магчымасці для кліентаў, сведчыць праведзены выданнем «Позірк» маніторынг іх актуальных прэс-рэлізаў.
«Банк БелВЭБ» па 7 ліпеня забараніў папаўняць тэрміновыя адзыўныя дэпазіты юрыдычных асоб і індывідуальных прадпрымальнікаў у рублях па дзейных дагаворах з працэнтнай стаўкай ад 13% гадавых і вышэй. Па астатніх укладах умовы застаюцца ранейшымі.
«Беларусбанк» прыпыніў заключэнне новых дагавораў па некаторых тэрміновых валютных укладах. Гаворка пра адзыўныя дэпазіты ў расійскіх рублях — «Класік Адзыўны з фіксаванай працэнтнай стаўкай» (3, 6, 9 месяцаў), «Рублёвы» (13, 18, 24, 36 месяцаў), «Фіксаваны Онл@йн» (3, 6, 9 месяцаў), «Рублёвы анлайн» (13, 18, 24, 36 месяцаў); безадзыўны — «На будучыню» (3 і 4 гады), а таксама пра безадзыўны ў доларах і еўра «Расцем разам». Папаўненне раней адкрытых укладаў не спыняецца.
«Белінвестбанк» даў магчымасць здымаць грошы ва ўласных банкаматах без выкарыстання картак — шляхам сканавання QR-кода праз «Мабільны банкінг», усталяваны на смартфоне з аперацыйнай сістэмай Android.
«Белаграпрамбанк» з 1 ліпеня будзе спаганяць 40 капеек за паслугу «Інфармаванне крэдытаатрымальнікаў пра памер плацяжу па крэдыце». Крэдытаатрымальнік можа адмовіцца ад паслугі — пісьмова.
«БНБ-Банк» з 1 чэрвеня зніжае да 800 тысяч долараў або еўра ліміт сярэднядзённага астатку, пры перавышэнні якога пачынае налічвацца камісія за абслугоўванне бягучага (разліковага) рахунку ў гэтых валютах. Па новых умовах камісію пачнуць спаганяць у ліпені — за чэрвень.
«БСБ Банк» 4 чэрвеня перавядзе дзейных кліентаў на новыя тарыфы па паслузе «Мультыэквайрынг». Камісія за прыём плацяжоў па картах складзе 2,5%.
«Прыёрбанк» паведаміў, што пры атрыманні наяўных сродкаў па картцы ў касах аддзяленняў банка кліенту неабходна паказваць пашпарт або іншы дакумент, што пацвярджае асобу.
«Сбер Банк у Беларусі» па 14 чэрвеня прапануе бацькам аформіць да свайго карт-рахунку асабістую банкаўскую картку для дзіцяці — за 1 капейку.
«Тэхнабанк» з 2 чэрвеня ўводзіць змяненні па пакеце разлікова-касавага абслугоўвання «Еўрапейскі 4.8». Камісія ў памеры 1,6% сумы (мінімум 75 долараў) будзе спаганяцца за перавод сродкаў па-за межы банка на падставе плацежнага даручэння кліента, плацежнага патрабавання ў расійскіх рублях з канверсіяй у індыйскія рупіі на карысць бенефіцыяраў, якія абслугоўваюцца ў банках Індыі.
На 1 траўня 2025 года ў Беларусі быў зарэгістраваны 21 банк (тры з іх — са 100-працэнтным замежным удзелам). Іх статутны капітал склаў 10 мільярдаў 103 мільёны рублёў (0,8% за месяц і +19,2% у гадавым вымярэнні), прыбытак — 1 млрд 141,1 млн рублёў (+32,8% і +1,9% адпаведна).
Цяпер чытаюць
«Ты ў нас у Беларусі!» — «Я маму тваю я*аў». Госцю з Алтая не спадабалася заўвага за кінуты ў цэнтры Мінска недакурак30
Каментары