Дасьледчы конкурс па гісторыі для школьнікаў Беларусі.
Дарагія сябры!
Грамадскае аб’яднанне «Дыярыуш» сумесна з Таварыствам беларускай мовы прапануе вам паўдзельнічаць у конкурсе «Гісторыя вачыма хатняга фатографа». Гэты даследчы конкурс па найноўшай (ХХ і ХХІ стст.) гісторыі Беларусі стартаваў 1 сакавіка ў рамках адукацыйнай праграмы «Блізкая гісторыя». За час існавання праграмы з 1998 г. было праведзена 6 конкурсаў, у якіх узялі ўдзел каля 1,5 тысячы чалавек. Падобныя конкурсы ладзяцца ў 17 краінах свету: Польшчы, Балгарыі, Расіі, Турцыі, Украіне, Эстоніі, Германіі, Англіі і інш.
Штогод пераможцы нацыянальных конкурсаў (па 3 чалавекі ад кожнай краіны, у тым ліку і ад нашай) будуць запрошаныя на летнюю (у Германію) і восеньскую (у адну з еўрапейскіх краін) сустрэчы, дзе адпачынак спалучаецца з дыскусіямі, конкурсамі, гульнямі і г.д.
Ладзіць такую сустрэчу EUSTORY (міжнародная арганізацыя, якая аб’ядноўвае гістарычныя конкурсы). Для лепшых і найбольш актыўных настаўнікаў — куратараў конкурсных прац — EUSTORY таксама праводзіць розныя цікавыя мерапрыемствы.
Нашы прызы пераможцам (а іх звычайна 35‑45 чалавек) — навейшыя кнігі па гісторыі Беларусі, якія могуць спатрэбіцца для вучобы і для паступлення ў ВНУ, і дыскі ды касеты сучаснай беларускай музыкі. Куратары таксама адзначаюцца прызамі. Па заканчэнні конкурсу лепшыя працы будуць апублікаваны ў зборніку.
Для актыўных аматараў гісторыі — удзельнікаў нашых конкурсаў, мы праводзім метадычныя спатканні, якія дапамагаюць у напісанні працы, вучаць рабіць гістарычнае даследаванне. Гэта наведванне музеяў, архіваў, бібліятэк, сустрэчы з цікавымі людзьмі: вучонымі, пісьменнікамі, удзельнікамі Вялікай Айчыннай вайны і інш.
У нашых конкурсах могуць удзельнічаць школьнікі пачынаючы з 7 класа, а таксама навучэнцы каледжаў, ліцэяў, тэхнікумаў, ПТВ школьнага ўзросту. Працу можна пісаць аднаму і групай, цалкам самастойна і пры дапамозе куратара. Куратарамі могуць быць настаўнікі і выкладчыкі, выхавальнікі і кіраўнікі гурткоў, а таксама бацькі, старэйшыя сваякі.
Апошні тэрмін дасылкі прац на сёлетні конкурс «Гісторыя вачыма хатняга фатографа»— 1 лістапада. Наперадзе лета, вольны ад вучобы час, калі можна плённа папрацаваць.
Усе працы разглядаюцца журы, у склад якога ўваходзяць знакамітыя навукоўцы, літаратары. А ў снежні месяцы пераможцы будуць запрошаны ў Мінск на цырымонію ўручэння ўзнагародаў.
Для ўсіх зацікаўленых мы высылем буклет з умовамі конкурса, а таксама метадычную брашуру, у якой акрамя рэгламента конкурсу, даюцца парады па напісанні даследчай гістарычнай працы (як збіраць матэрыялы, апрацоўваць іх, рабіць гістарычнае даследванне, парады куратару і г. д.). Калі захочаце атрымаць брашуру (яна распаўсюджваецца бясплатна), альбо спатрэбяцца нейкія дадатковыя тлумачэнні, дапамога — звяртайцеся.
Нашы каардынаты: Блізкая гісторыя», а/с № 128, 220064, г. Мінск. тэл. 8‑029 317‑46‑25 (Velcom), 8‑029 505‑63‑85 (МТС)
E‑mail: [email protected]
Каардынатар праграмы «Блізкая гісторыя» Ірына Коваль.
Цяпер чытаюць
«Калі б не «Вясна-1996, мы б былі Татарстанам». 30 гадоў таму беларусы ўжо пратэставалі супраць Лукашэнкі і Расіі — як гэта было14
Каментары