Пасля Новага года тэлеканал «Белсат» пачне вяшчаць у поўным аб’ёме, паведаміла 28 снежня падчасонлайн-канферэнцыі на сайце «Радыё Свабода» дырэктар тэлеканала Агнешка Рамашэўска.
«У нас няма стоадсоткавай упэўненасці, ці хопіць сродкаў на ўвесь год, але, нягледзячы на гэта, мы ад 3 студзеня будзем зноў выходзіць у поўным аб’ёме», — сказала яна. Калектыў тэлеканала таксама не губляе надзеі знайсці ў наступным годзе спонсара.
«Еўрасаюз не надта ведае, як праводзіць дзейнасць па падтрымцы дэмакратыі ў такіх краінах, як Беларусь. Такі досвед у свой час мелі Злучаныя Штаты, але Еўропе яго не хапае. Такія праекты, як „Белсат“, часта становяцца ахвярамі ціхай дыпламатыі інтарэсаў ці real politik», — патлумачыла яна.Адказваючы на пытанне аб прычынах скарачэння фінансавай падтрымкі тэлеканала, якая адбылася раней, Рамашэўска выказала думку, што Беларусь проста не з’яўляецца прыярытэтам у палітыцы Еўрасаюза.
Дырэктар тэлеканала падкрэсліла, што, нягледзячы на неадназначную сітуацыю з фінансаваннем, у наступным годзе плануецца выпусціць 14 дакументальных фільмаў з цыкла «Невядомая Беларусь». Рэдакцыя канала таксама плануе зрабіць шэраг рэпартажаў з цыкла «Без рэтушы», першы з якіх выйдзе на пачатку студзеня пад назвай «Вясна…» і будзе прысвечаны Алесю Бяляцкаму. Таксама ў студзені на тэлеканале пачнецца паказ пятнаццаці серый гістарычнай праграмы «Гісторыя пад знакам Пагоні».
«Будзем таксама спрашчаць прагляд і пампаванне нашых праграм „на запыт“, — сказала яна. — Будзем імкнуцца стварыць магчымасць прагляду праз мабільныя прылады».Апроч таго, на сёння каманда «Белсата» працуе над пашырэнем працягласці
онлайн-трансляцыі ў Інтэрнэце.
Тэлеканал «Белсат» скараціў вяшчанне з 26 лістапада. Рамашэўска ў эфіры тэлеканала паведаміла, што гэтыя змяненні часовыя і звязаныя з фінансавымі цяжкасцямі.
«За пяць гадоў працы за даволі сціплыя сродкі ўпершыню „Белсату“ іх не хапіла на існаванне да канца года. Таму мы павінны адмовіцца ад той праграмы тэлебачання, да якой першапачаткова рыхтаваліся. Мы апынуліся ў вельмі сур’ёзнай сітуацыі і вымушаныя значна скараціць трансляцыю», — заявіла дырэктар тэлеканала.
Спадарожнікавы тэлеканал «Белсат» вяшчае з 10 снежня 2007 года. Ён быў створаны як структурная адзінка Польскага тэлебачання, дзе і размяшаецца афіцыйная рэдакцыя «Белсата». На тэрыторыі Беларусі канал не мае афіцыйнага статусу, і яго праца абапіраецца на фрылансераў.
Каментары