Стала вядома, на якім месцы сядзеў пасажыр, які адзіны ацалеў у катастрофе самалёта ў Індыі
У сеціве разыходзіцца відэа з, верагодна, адзіным пасажырам, які выжыў у авіякатастрофе самалёта Boeing у Індыі. Усяго загінулых не менш за 250, але можа быць і куды больш, паколькі самалёт упаў у жылым раёне.
40-гадовы грамадзянін Вялікабрытаніі Вішваш Кумар Рамеш, які быў знойдзены на месцы разбору абломкаў Boeing 787-8 Dreamliner, расказаў выданню Hindustan Times, што праз трыццаць секунд пасля ўзлёту ён пачуў «гучны шум», а «затым самалёт разбіўся».
«Калі я ўстаў, вакол мяне былі целы. Я спалохаўся. Я ўстаў і пабег. Вакол мяне былі абломкі самалёта. Хтосьці схапіў мяне, пасадзіў у машыну хуткай дапамогі і адвёз у бальніцу».
Вішваш Кумар Рамеш сядзеў у пярэдняй частцы самалёта, на месцы 11A.
Дакладныя звесткі пра колькасць ахвяр падчас крушэння самалёта цяпер высвятляюцца. Начальнік мясцовай паліцыі заявіў, што на месцы авіякатастрофы знайшлі ўжо 204 целы. Аднак у цяперашні час невядома, ці былі ўсе 204 чалавекі ў самалёце ці некаторыя з іх былі на зямлі, калі самалёт разбіўся.
Камісар паліцыі горада Ахмедабад гаворыць, што паколькі самалёт разбіўся ў жылым раёне, «некаторыя мясцовыя жыхары таксама маглі загінуць».
У Федэрацыі медыцынскіх асацыяцый Індыі (FAIMA) паведамілі, што прыкладна 50-60 студэнтаў-медыкаў даставілі ў бальніцу пасля таго, як самалёт упаў на бальнічны інтэрнат. Асацыяцыя паведамляе, што пяцёра студэнтаў прапалі без вестак, і прынамсі двое знаходзяцца ў аддзяленні інтэнсіўнай тэрапіі. Таксама прапалі без вестак сваякі некаторых лекараў.
Паводле звестак Air India, на борце самалёта знаходзіліся 242 пасажыры і члены экіпажа (10 бортправаднікоў і 2 пілоты). Сярод пасажыраў ужо ўстаноўленыя імёны 169 грамадзян Індыі, 53 грамадзян Вялікабрытаніі, 1 грамадзяніна Канады і 7 грамадзян Партугаліі.
Выданне Business Insider піша, што самалёт, зарэгістраваны як VT-ANB, упершыню быў перададзены Air India ў студзені 2014 года. Гэтае здарэнне, падобна, стала першай такой катастрофай для Boeing 787, які традыцыйна адносілі да аднаго з самых бяспечных пасажырскіх самалётаў.
Знойдзена цела супрацоўніцы віцебскай хіміі — яе шукалі два з паловай гады1
Каментары