У Пінску затрыманы 30-гадовы мясцовы жыхар, які займаўся вырабам падробленых беларускіх грашовых купюр.
Як паведаміў БелаПАН намеснік начальніка Пінскага міжраённага аддзела Следчага камітэта Дзмітрый Ліра, мужчына падазраецца ў тым, што 25 мая па месцы жыхарства з выкарыстаннем камп'ютарнай тэхнікі вырабіў тры банкноты вартасцю 20 тыс. рублёў кожная і перадаў іх свайму знаёмаму.
Той збыў фальшыўкі ў маршрутных аўтобусах у Пінску: купляў у кандуктара талоны і браў рэшту.
Згодна з заключэннем эксперта, падробленыя купюры зробленыя спосабам кропельна-струйнага друкавання. Яны канфіскаваныя.
27 мая Пінскім міжраённым аддзелам СК у дачыненні да работніка адной з прыватных фірм распачата справа па ч. 1 арт. 221 Крымінальнага кодэкса (выраб з мэтай збыту падробленых грошай).
Падчас вобыску ў яго канфіскаваная камп'ютарная тэхніка. Раней мужчына судзімы не быў.