У Крыме загінула пяцігадовая Багдана з Беларусі

Суд у Крыме ў верасні 2025 года прызнаў уласніцу гасцявога дома ў Судаку Таццяну Вадзецкую вінаватай у смерці пяцігадовай Багданы, якая прыехала на адпачынак разам з бацькамі і двума братамі.

Трагедыя адбылася летам 2024 года ў «Гасцявым доме на Камунальнай». Тут адпачывала шматдзетная сям'я з Беларусі. Раніцай, калі сям'я рыхтавалася да ад'езду, маці стаяла спінай да шафы і складвала рэчы, дачка была побач і размаўляла з ёй, бацька выйшаў на вуліцу. Праз некалькі хвілін маці пачула крык дачкі і моцны грукат — драўляная шафа, якая стаяла ля сцяны, упала, а дзяўчынка апынулася пад ёй. Бацька, які забег у пакой, падняў шафу і занёс Багдану, якая была без прытомнасці, у машыну, каб ехаць у бальніцу.

Паводле заключэння судова-медыцынскай экспертызы, дзяўчынка атрымала адкрытую чэрапна-мазгавую траўму, што выклікала ацёк мозгу і лёгкіх і поліарганную недастатковасць. Праз 35 дзён лячэння ў бальніцы Судака Багдана памерла.

Экспертыза шафы выявіла дэфект пластыкавай устаўкі ва ўнутранай частцы правай пярэдняй ножкі — матэрыял не быў цэласны, праз што апора не цалкам дакраналася да падлогі.

Павялічыць

Вадзецкая віну не прызнала. У судзе яна сцвярджала, што шафа, набытая ў 2013 годзе, ніколі раней не падала і не хісталася, а перад засяленнем сям'і яна асабіста паклала ў яе пасцельную бялізну і ніякіх пашкоджанняў не заўважыла.

Па яе версіі, Багдана, якая любіла гуляць у шафе і хавацца ў ёй, магла самастойна залезці наверх, адкуль і ўпала ўніз галавой. Жанчына ўказвала на тое, што на самой шафе і суседняй тумбачцы няма слядоў крыві, а таксама на тое, што ніхто не бачыў момант падзення.

Суд адхіліў усе довады Вадзецкай. Вырашылі, што траўма ўзнікла ад удару аб'ёмным плоскім прадметам значнай масы і не магла ўтварыцца пры падзенні з вышыні ўласнага росту дзіцяці. Наяўнасць жа дэфекту ножкі, які рабіў канструкцыю няўстойлівай, паводле суда, пацвярджае менавіта версію падзення шафы, а не самавольныя дзеянні дзяўчынкі. Суд указаў, што Вадзецкая, займаючыся здачай жылля ў арэнду, ведала пра стан мэблі ў пакоях, у тым ліку пра шафу, якая эксплуатавалася больш за 10 гадоў і тэрмін службы якой скончыўся, аднак працягвала засяляць у гэты пакой гасцей, у тым ліку і сям'ю з малой дзяўчынкай.

Жанчыне прысудзілі тры гады калоніі ўмоўна з выпрабавальным тэрмінам два гады — за «аказанне паслуг, якія не адпавядаюць патрабаванням бяспекі жыцця і здароўя спажыўцоў, што па неасцярожнасці прывяло да смерці чалавека». Пры гэтым маці дзяўчынкі ў судзе заявіла, што прэтэнзій да гаспадыні дома не мае і лічыць здарэнне няшчасным выпадкам.

• 0
• 0
• 0
• 7
• 3
• 12
• 0
• 0