У 2013 годзе ў Беларусі павялічылася колькасць выяўленых наркалабараторый і памяшканняў, прыстасаваных для вырошчання канопляў. Эксперты МУС упэўненыя, што асноўнай прычынай гэтага з'яўляецца эфектыўная праца па перакрыцці знешніх каналаў паставак наркотыкаў.
Як паведаміла ўпраўленне інфармацыі і грамадскіх сувязяў МУС, на мінулым тыдні ў сваёй кватэры па вуліцы Адзінцова ў Мінску быў затрыманы беспрацоўны 1980 года нараджэння. Адзін з пакояў мужчына прыстасаваў для вырошчвання канопляў (сам жа туліўся ў пярэднім пакоі).
У затрыманні зламысніка ўдзельнічалі супрацоўнікі ўпраўлення па наркакантролі і супрацьдзеянні гандлю людзьмі МУС сумесна з калегамі з Ленінскага РУУС сталіцы і аддзела дэпартамента аховы. Ліквідавана 29 кустоў і абсталяванне. Аператыўным работнікам затрыманы растлумачыў, што насенне канопляў знайшоў на вуліцы. Распачата справа паводле ч. 1 арт. 328 Крымінальнага кодэкса (незаконны абарот наркатычных сродкаў, псіхатропных рэчываў, іх прэкурсораў і аналагаў).
Прыкладна месяц таму ў адным з прыватных дамоў па вуліцы Надзеждзінскай у Мінску адбыўся пажар. Ратавальнікі, справіўшыся з агнём, выявілі буйную лабараторыю па вырошчванні канопляў. Відавочнай прычынай узгарання стала замыканне, якое адбылося з-за выкарыстання вялікай колькасці электрапрыбораў, якія абслугоўвалі наркалабараторыю.
За пяць месяцаў гэтага года вартавыя парадку выявілі 20 падобных памяшканняў (за аналагічны перыяд мінулага — 4). Больш выяўлена і лабараторый па вытворчасці сінтэтычных наркотыкаў: з-за таго, што каналы іх пастаўкі з-за мяжы ўвесь час перарываюцца, з'яўляюцца ахвотныя вырабляць іх у самой краіне.
Каб апярэдзіць рост актыўнасці мясцовых наркадзяльцоў, у МУС прапрацоўваецца ініцыятыва аб змяненні заканадаўства ў частцы ўзмацнення жорсткасці санкцый за вытворчасць, вырошчванне, выраб наркотыкаў.
Цяпер чытаюць
У Францыі ад спёкі загінуў дальнабойшчык з Докшыцаў8
Каментары