Ва Украіне разбіўся аўтобус з беларускімі дзецьмі, адзін падлетак загінуў
Яны ехалі ў Балгарыю на мастацкі конкурс.
Глядзі таксама: Мінтранс узмацняе кантроль за перавозкамі пасажыраў
Як паведамляе ДСНС Валыні, 11 ліпеня ў 7.34 на дарозе Луцк-Ковель сутыкныліся два пасажырскія аўтобусы. У адным знаходзілася 50 грамадзян Беларусі, у іншым — пасажыры, што ехалі з Ковеля ў Шацк (Украіна).
Загінулі 8 чалавек, у тым ліку адзін 13-гадовы падлетак з Беларусі, яшчэ 27 чалавек пацярпелі. 21 з іх — беларусы.
Беларускіх дзяцей вязлі ў Балгарыю. Гэта быў аўтобус з балгарскімі кіроўцамі. Адзін з іх таксама загінуў. Па папярэдняй інфармацыі, аўтобус з балгарскімі нумарамі падчас абгону выехаў на сустрэчную паласу і сутыкнуўся.
Пацярпелыя шпіталізаваныя ў Ковельскую цэнтральную раённую бальніцу. На месца здарэння з Кіева выехаў супрацоўнік консульскага аддзела пасольства Беларусі ва Украіне. Іншыя ўдзельнікі аварыі знаходзяцца ў санаторыі маці і дзіця «Турыя».
Выехаў аўтобус з беларускай сталіцы 10 ліпеня каля 21.30. Арганізатар паездкі — беларуска-балгарская турыстычная кампанія «Белфрэш».
Як паведамілі НН у кампаніі,
гэта ехала танцавальная група ў дзіцяча-моладзевы цэнтр «Чарнаморац». Было 36 дзяцей ад 10 гадоў і 14 дарослых (у тым ліку бацькі). Вярнуцца з Балгарыі яны павінны былі 14 ліпеня. На месца здарэння ўжо прыехаў беларускі аўтобус, каб забраць тых, хто найменш пацярпеў. Ва Украіну таксама выехалі заснавальнік і дырэктар кампаніі.
Супрацоўнікі «Белфрэш» цяпер займаюцца тым, што звязваюцца з роднымі дзяцей. Пакуль не ўсіх атрымалася адшукаць.
МНС Беларусі адкрыла тэлефонную «гарачую» лінію для інфармавання родных пацярпелых і аказання ім псіхалагічнай дапамогі: (017) 209-27-76, (017) 209-27-67.
Каментары