21 ліпеня на пашы каля аграгарадка Пруднікі, што ў Докшыцкім раёне, работнікімалочна-таварнай фермы забілі невядомую жывёлу, якая нападала на кароў і цялятаў.
Пра гэта паведамілі ў райаддзеле па надзвычайных сітуацыях. Ратавальнікі расказалі, што жывёла кусала кароў і цялятаў за ногі.
Забітую істоту забраў і перавёз на тэрыторыю ветэрынарнай станцыі галоўны ветэрынарны доктар Докшыцкага раёна Алесь Салаўёў. Ён распавёў:
«Гэта жывёла — самая дробная з траіх ёй падобных, якіх бачылі ля Пруднікаў. Яшчэ дзве ўцяклі».
Алег Салаўёў не можа назваць дакладна від жывёлы. Кажа, што і паляўнічыя спрачаюцца: хто б гэта мог быць.
Паляўніцтвазнавец Докшыцкай раённай арганізацыйнай структуры Беларускага таварыства паляўнічых і рыбаловаў Дзяніс Паўловіч выказаў здагадку, што гэта мутант нейкага віду.«Я бачыў труп гэтай жывёлы на тэрыторыі ветстанцыі. Для мяне дык на гіену падобна. Нешта ў ёй лісінае, нешта ад янота, нешта ад сабакі».
Як стала вядома карэспандэнту «Нашай Нівы», труп жывёлы, якая нападалана кароў у Докшыцкім раёне, спалілі.
«Гэтаму трупу ўжо тры дні. Таму яго ўтылізавалі», — паведаміў сумную навіну намеснік галоўнага доктара Докшыцкай раённай ветэрынарнай станцыі Віктар Саковіч.
Біялагічны від, да якога належыць забітая пачвара, так і не высветлілі.Саковіч прызнаўся, што «не бачыць у здарэнні нічога дзіўнага».
Аднак шанец даведацца, ці належаў труп гіене, хвораму сабаку, незвычайнаму метысу ці містычнай чупакабры, усё ж ёсць. Саковіч сказаў, што дастаўленая на ветстанцыю істота «была нечым кшталту шчанюка».
«А некалькі дарослых асобінаў жывыя і ўцяклі ў лес», — пацвердзіў ветэрынар.
У Акадэміі навук нашага журналіста папрасілі даслаць не фота, а біялагічны матэрыял забітага звера. Тады яго можна будзе ідэнтыфікаваць дакладна.
Каментары