Дзяўчынка сустрэла на лецішчы мядзведзя. Ён мірна адпачываў у двары
Прыгода здарылася ў Віцебскай вобласці.
У вёсцы Галінова дзяўчынка сустрэла мядзведзя проста на дачным участку. Драпежнік адпачываў паміж дрэвамі ў двары, калі яго заўважыла Маша, якая гуляла на вуліцы. Спалохаўшыся, дзяўчынка адразу паклікала бацьку, піша Onliner.by.
— Пры сустрэчы з мядзведзем, вядома, зазнаў вялікі шок. Але ў той момант я толькі ўспомніў, што яны баяцца гучных гукаў, і пачаў пляскаць у далоні. Ну так, сапраўды, гэта дапамагло, — расказвае бацька Машы Дзмітрый Баршчоў.
Мясцовыя жыхары расказваюць, што мядзведзя ў вёсцы бачаць не ўпершыню — падобныя выпадкі былі і некалькі гадоў таму. Жывёліна нікога не чапала, але спакойна адпачываць пры такім суседстве было складана.
Спецыялісты нагадваюць: пры сустрэчы з драпежнікам нельга ўцякаць, лепш спакойна адыходзіць назад і спрабаваць адпужаць яго гучнымі гукамі — жывёлу адпужвае ўсё, што стварае шум: плясканне ў далоні, музыка на мабільным тэлефоне, свіст.
Каментары