У цэнтры Мінска затрымалі ўкраінскага пісьменніка, які спытаў у міліцыянера: «Калі рухне рэжым Лукашэнкі?» ФОТА
У суботу ў цэнтры Мінска, на Нямізе, падчас масленічных гулянняў, затрымалі 28-гадовага ўкраінскага пісьменніка з Кіева Антона Чарнічку, які падышоў да міліцыянера і спытаў: «Калі рухне рэжым Лукашэнкі?».
Сёння яго прывезлі ў суд Цэнтральнага раёна Мінска і будуць судзіць, паведамляе карэспандэнт газеты NN.BY.
Пазней да суда пад'ехала сяброўка Антона, якая распавяла падрабязнасці затрымання.
Украінцы колькасцю дзевяць чалавек прыехалі ў Мінск у суботу на машынах, пайшлі гуляць па горадзе. Антон часова адбіўся ад агульнай групы. Калі астатнія вярнуліся да машынаў, то пабачылі, што іх машыны эвакуююць, а калі машын дзяжурыць міліцыя. Па словах дзяўчыны, іх дапыталі, тады яны даведаліся, што Антон затрыманы.
Па словах Змітра Дашкевіча, які перасёкся з Чарнічкам на Акрэсціна, Антону ў міліцыі прапаноўвалі падпісаць пратакол 17.1 (лаянка ў грамадскім месцы), маўляў, падпішаш — адпусцім. Не знаёмы з беларускімі рэаліямі хлопец, як бачна, падпісаў пратакол.
Суд завершыўся пасля 17-й, украінец атрымаў 3 сутак арышту.
Каментары