Польшча выслала вайсковага аташэ Беларусі, абвінавачвае ў шпіянажы на Расію

Вайсковага аташэ амбасады Беларусі ў Польшчы папрасілі пакінуць тэрыторыю Польшчы. Контрразведка Агенцтва ўнутранай бяспекі лічыць, што ён займаўся шпіянажам на карысць Расіі.

Паводле wyborcza.pl, вайсковага аташэ Беларусі злавілі працаўнікі контрразведкі з Агенцтва ўнутранай бяспекі, калі той фатаграфаваў вайсковыя аб'екты ў Быдгашчы. Як даведалася Радыё «TOK FM», гэтыя аб'екты з'яўляюцца навучальным цэнтрам НАТО.

«Ён [дыпламат з Беларусі] зашмат сабе дазваляў», – пачулі карэспандэнты газеты «Dziennik», калі папрасілі пракаментаваць гэты выпадак прадстаўнікоў сілавых міністэрстваў.

«Мы не бачым розніцы між беларускімі і расійскімі шпіёнамі, — сказала «Газеце выборчай» крыніца ў польскім Міністэрстве ўнутраных спраў. — Абедзве краіны супольна вядуць разведвальную і контрразведвальную дзейнасць, кіруюць якой расіяне. І ў рамках гэтай супольнай дзейнасці беларусы «спецыялізуюцца на Польшчы». Гэта значыць, што любую інфармацыю, якую яны здабываюць у нашай краіне, мы трактуем як такую, якая перадаецца Расіі», — сказала крыніца. 

Вайсковы аташэ Беларусі — гэта адзін з двух выяўленых у Польшчы шпіёнаў, пра якіх паведамлялася ўчора. Іншы шпіён быў затрыманы значна раней.

Ён трапіў у рукі Службы ваеннай разведкі Польшчы два гады таму. Ужо тады Апеляцыйная пракуратура выставіла яму абвінавачанне ў шпіянажы. З таго часу беларус застаецца пад арыштам.

Пра гэтую гісторыю ведала толькі вузкае кола людзей у Польшчы, адзначыў прадстаўнік сілавых ведамстваў. Толькі цяпер, калі ў суд трапіў акт абвінавачання, стала вядома больш падрабязнасцяў. 

Паводле дзвюх крыніцаў газеты «Dziennik», сітуацыя са шпіёнамі з Беларусі — вельмі нетыповая, таму праца польскіх службаў і пракуратуры над абвінаваўчымі высновамі доўжылася больш за два гады. Праблема палягала на тым, падае выданне, што той грамадзянін Беларусі раней супрацоўнічаў з расфармаванаю некалькі гадоў таму Вайсковай інфармацыйнаю службаю Польшчы.

Кіраўніцтва аддзелу, што займалася разведкаю, лічыла яго сваёй крыніцаю ў беларускіх спецслужбах, а яго самога разглядала як каштоўнага супрацоўніка, які перадаваў вельмі істотную інфармацыю пра беларускую армію.

За свае паслугі ад польскага боку ён атрымліваў шчодрыя ўзнагароды — да некалькіх сотняў тысяч долараў.

«Насамрэч, ён быў дэзінфарматарам», — распавёў адзін са следчых. Толькі ў польскай Службе вайсковай разведкі, якая паўстала пасля роспуску Вайсковай інфармацыйнай службы, па-новаму прааналізавалі інфармацыю, якую даваў беларус. З часам высветлілася, што насамрэч ён выконваў заданні для спецслужбаў Беларусі, піша газета.

• 0
• 0
• 0
• 0
• 0
• 0
• 0
• 0