Міністр замежных спраў Літвы сустрэўся з прадстаўнікамі беларусаў і запэўніў іх у нязменнасці палітыкі
12 чэрвеня міністр замежных спраў Літвы Кястуціс Будрыс правёў у Вільні сустрэчу з прадстаўнікамі беларускіх дэмакратычных сіл, грамадзянскай супольнасці, дыяспары, незалежных сродкаў масавай інфармацыі, адукацыйных і бізнэс-ініцыятыў, а таксама рэлігійных супольнасцяў, якія дзейнічаюць на тэрыторыі Літвы.
Падчас сустрэчы бакі абмеркавалі становішча беларускай дэмакратычнай супольнасці ў Літве і ўмовы яе далейшай дзейнасці.
Міністр пацвердзіў, што Літва працягвае падтрымліваць беларускі народ і лічыць Вільню бяспечным месцам, дзе беларускія арганізацыі могуць свабодна працаваць, развіваць свае праекты і падтрымліваць грамадзянскія ініцыятывы.
Асобная ўвага была нададзена практычным праблемам, з якімі сутыкаюцца беларусы ў Літве. Удзельнікі сустрэчы абмеркавалі пытанні, звязаныя з атрыманнем шэнгенскіх віз, афармленнем дазволаў на часовае пражыванне, выдачай іншых неабходных дакументаў, а таксама працэсам больш паспяховай інтэграцыі грамадзян Беларусі ў літоўскае грамадства.
Пры гэтым было адзначана, што ўсе рашэнні ў гэтай сферы Літва прымае, захоўваючы баланс паміж жаданнем дапамагаць беларусам і неабходнасцю выконваць патрабаванні нацыянальнага заканадаўства, права Еўрапейскага саюза і мер для гарантавання дзяржаўнай бяспекі.
Кястуціс Будрыс падкрэсліў, што Літва і прадстаўнікі беларускіх дэмакратычных сіл маюць агульную мэту — бачыць Беларусь дэмакратычнай, незалежнай і свабоднай дзяржавай. Ён заявіў, што цяперашні аўтарытарны рэжым у Беларусі літоўскія ўлады разглядаюць як пагрозу нацыянальнай бяспецы Літвы, паколькі Беларусь з’яўляецца палітычным і вайсковым саюзнікам Расіі, якая вядзе агрэсіўную палітыку.
У сувязі з гэтым міністр выказаў меркаванне, што на ўзроўні Еўрапейскага саюза неабходна працягваць палітыку непрызнання цяперашніх беларускіх уладаў, падтрымліваць міжнародную ізаляцыю рэжыму і захоўваць санкцыйны ціск. Адначасова, паводле яго слоў, неабходна працягваць падтрымку беларускіх дэмакратычных структур і звычайных грамадзян Беларусі.
Па выніках сустрэчы ўдзельнікі дамовіліся працягваць супрацоўніцтва і рэгулярны дыялог. Асноўнымі кірункамі супольнай працы павінны стаць развіццё беларускай грамадзянскай супольнасці, падтрымка адукацыйных праектаў, умацаванне ўстойлівасці да дэзынфармацыі і супрацьдзеянне іншым агульным пагрозам.
Цяпер чытаюць
Лукашэнка заклікаў жыхароў Гомельшчыны не хвалявацца з-за ўльтыматуму Зяленскага адносна рэтранслятараў40
Каментары
Калі чалавек уяўляе пагрозу нацыянальнай бяспецы Літвы, ён непазбежна будзе прызнаны такім. Ні загады Ціханаўскай, ні слёзы ці крыкі розных асоб не зменяць сітуацыі.