Барак Абама заявіў, што праз супрацьстаянне Захаду з Расіяй і анексію Крыма новая халодная вайна не пачынаецца, але расійскі народ зразумее, што не зможа дасягнуць бяспекі, заможнасці і павагі ў свеце, выкарыстоўваючы грубую сілу.
Пра гэта амерыканскі прэзідэнт заявіў пасля саміту ЕС — ЗША.
«Зразумейце, гэта не новая халодная вайна. У адрозненне ад Савецкага Саюза, Расія не стаіць на чале блока дзяржаваў, не мае глабальнай ідэалогіі. ЗША і НАТО не хочуць ніякага канфлікту з Расіяй», — сказаў амерыканскі прэзідэнт.
«Насамрэч за 60 гадоў мы з НАТО не заваёўвалі новых тэрыторый, але былі разам, каб нашы народы былі свабоднымі. Але што мы заўсёды будзем рабіць — дык гэта трымацца нашага непарушнага абавязання — Артыкула 5 (Дамовы НАТО), абараняючы суверэнітэт і тэрытарыяльную цэласнасць нашых саюзнікаў. І гэтае абавязанне мы не парушым», — дадаў Абама.
Ён адзначыў, што цяпер самалёты НАТО патрулююць неба над балтыйскімі краінамі, і НАТО таксама ўзмацніла прысутнасць у Польшчы і далей гатовая нарошчваць прысутнасць у рэгіёне ў выпадку неабходнасці.
«Вядома, Украіна — не сябар НАТО, часткова праз складаную гісторыю ўзаемаадносін з Расіяй. З часам расійскі народ зразумее, што ён не зможа дасягнуць бяспекі, заможнасці і жаданага статусу ў свеце з дапамогай грубай сілы», — сказаў Абама.
«Вось чаму цягам крызісу (у Крыме) мы будзем аб'ядноўваць наш ціск на Расію з палітыкай адчыненых дзвярэй для дыпламатыі. І я веру, што для Украіны і Расіі стабільны мір прыйдзе праз дээскалацыю, праз наўпросты дыялог урадаў краін і міжнароднай супольнасці», — заявіў амерыканскі лідар.
Каментары