Удзельнікам акцыі 19 снежня 2010 г. пагражалі абвінавачванні, якія прадугледжваюць 15-гадовыя тэрміны арышту і вышэйшую меру пакарання.
Пра тое, што ўлады рыхтавалі правакацыі супраць беларусаў, якія выйшлі на Плошчу, сведчаць словы Мікалая Аўтуховіча. Палітвязень выйшаў на волю пасля больш як пяцігадовага тэрміну, праведзенага за кратамі. Як сказаў Аўтуховіч, яго хацелі абвінаваціць ва ўвозе партыі зброі ў Беларусь. Ён упэўнены, што ўлады хацелі звязаць гэта з будучай Плошчай. Праваабаронца Валянцін Стэфановіч распавёў аб наступствах такога абвінавачвання.
«Усё залежыць ад таго, для якіх мэтаў, на думку следства, нібыта прывозілі гэтую «партыю зброі». Таму складана сказаць, якім чынам гэта маглі б кваліфікаваць. Ёсць артыкул «змова і іншыя дзеянні з мэтай захопу дзяржаўнай улады». Ёсць артыкул «тэрарыстычны акт», які можа быць звязаны з выкарыстаннем зброі, «дыверсія». Усе яны адносяцца да главы Крымінальнага кодэкса «Злачынствы супраць дзяржавы» і прадугледжваюць розныя віды пакаранняў. Напрыклад, «змова з мэтай захопу ўлады» караецца тэрмінам ад 8 да 12 гадоў, сам «захоп і ўтрыманьне ўлады» — ад 10 да 15 гадоў. А калі ўсе гэтыя злачынствы звязаныя са смерцямі людзей, адказнасць можа быць аж да смяротнага пакарання», — заявіў Валянцін Стэфановіч.
Праваабаронца згодны з палітвязнем Мікалаем Аўтуховічам у тым, што падобныя абвінавачванні маглі быць выкарыстаны для таго, каб ўжыць больш жорсткія рэпрэсіі ў дачыненні да ўдзельнікаў Плошчы.
«Усе гэтыя тры артыкулы цалкам маглі выкарыстоўваць. І дзеянні па захопу ўлады, і дыверсія … Цяжка сказаць, як гэта змаглі б кваліфікаваць, але, мяркую, што як мінімум, у якасці тэрарыстычнага акта дакладна. А калі б гэта звязалі са смерцямі людзей, то ў выніку цалкам маглі б прымяніць і вышэйшую меру пакарання. Я не магу дакладна казаць, таму што пра гэта трэба пытацца ў тых, хто прыдумаў гэта абвінавачванне. Калі ўявіць сабе, што на Плошчы адбыўся, напрыклад, выбух і пачалі б шукаць вінаватых, то ім магло б пагражаць смяротнае пакаранне», — сказаў праваабаронца.
Нагадаем, Плошча 19 снежня 2010 г. стала адной з самых масавых акцый беларускага народа. Каля 50 тысяч грамадзян краіны выйшлі пратэставаць супраць сфальсіфікаваных вынікаў прэзідэнцкіх выбараў. Акцыя была жорстка падаўлена войскамі і міліцыяй.
Каментары