Канфіскаваць аўтамабіль у п’янага кіроўцы ўжо пасля першага затрымання, а не пасля другога, як цяпер, прапануе віцэ-прэм’ер урада Анатоль Тозік.
Сёння ён выступіў перад дэпутатамі Нацыянальнага сходу Беларусі і распавёў пра сацыяльныя аспекты працы ўраду. Сваю прапанову віцэ-прэм’ер абгрунтаваў так: «Толькі за чатыры месяцы гэтага года было затрымана каля дзевяці тысяч п’яных кіроўцаў, прычым 707 з іх былі затрыманыя п’янымі ў другі раз».
Менавіта гэтыя лічбы даюць падставу, на думку Анатоля Тозіка, зрабіць заканадаўства больш жорсткім і нецярпімым да п’яных кіроўцаў.
Акрамя таго, віцэ-прэм’ер прапанаваў забараніць продаж алкаголю на аўтамабільных трасах, а таксама ўвесці забарону на продаж алкаголю па ўсёй тэрыторыі Беларусі, пачынаючы з 21 гадзіны і да 10 гадзінаў раніцы.
Віцэ-прэм’ер таксама сказаў, што краіна траціць вельмі вялікія сродкі на тое, каб лячыць людзей, якія захварэлі ў выніку злоўжывання алкаголем і тытунём.
Анатоль Тозік прапанаваў, каб дэпутаты Нацыянальнага сходу прынялі закон аб асабістай адказнасці грамадзяніна Беларусі за стан свайго здароўя.
Каментары