Старшыня Гомельскага аблвыканкама Уладзімір Дворнік «за патуранне, дапушчаныя недахопы і пралікі ў кадравай працы, непрыманне належных мер па выкананні заканадаўства аб дзяржаўнай службе і барацьбе з карупцыяй» папярэджаны аб няпоўнай службовай адпаведнасці.
Адпаведнае распараджэнне Аляксандр Лукашэнка падпісаў 5 чэрвеня, паведаміла прэс-служба прэзідэнта.
19 мая былі затрыманы першы намеснік старшыні аблвыканкама Віктар Банчук і намеснік старшыні Віктар Трызна. Яны абвінавачваюцца ў злоўжыванні ўладай і службовымі паўнамоцтвамі.
Банчук і Трызна былі прызначаны на свае пасады адначасова — 28 снежня 2012 года. Банчук раней узначальваў Рагачоўскі райвыканкам, Трызна працаваў на пасадзе кіраўніка справамі Гомельскага аблвыканкама.
У аблвыканкаме Банчук курыраваў пытанні развіцця аграпрамысловага комплексу вобласці, харчовых рэсурсаў, вытворчасці і перапрацоўкі сельскагаспадарчай прадукцыі і г. д. Непасрэдна ў яго падпарадкаванні знаходзіліся камітэт па сельскай гаспадарцы і харчаванні і землеўпарадкавальная служба.
Трызна курыраваў пытанні ідэалагічнай працы, аховы здароўя, фармацыі, адукацыі, культуры, спорту і турызму, СМІ. Чыноўнік узначальвае камісію па садзейнічанні ў забеспячэнні правоў ахвяраў палітычных рэпрэсій 20—80-х гадоў XX стагоддзя і ўвекавечанні іх памяці, а таксама камісію па супрацьдзеянні карупцыі ў Гомельскім аблвыканкаме.
Уладзімір Дворнік быў прызначаны кіраўніком Гомельскай вобласці 29 снежня 2010 года.
