Вячорка: Я не магу станавіцца закладнікам невядомай мне палітыкі. Івашкевіч: Трэба арганізаваць шырокі рух за далучэньне краіны да Эўрасаюзу. Міхалевіч: Патрэбная шырокая нацыянальная кааліцыя.
Вечарам у пятніцу адбылося паседжаньне менскай гарадзкой арганізацыі Партыі БНФ. Удзел у паседжаньні ўзялі ўсе трое кандыдатаў на пасаду старшыні Партыі – Вінцук Вячорка, Віктар Івашкевіч і Алесь Міхалевіч. Вёў паседжаньне кіраўнік менскай гарадзкой арганізацыі Аляксей Кавалец.
Кожны з кандыдатаў меў невялікі дзесяціхвілінны выступ, пасьля чаго прысутныя маглі задаць ім свае пытаньні. Сойм пачаўся з прыемнай навіны, што была нарэшце зарэгістраваная віцебская абласная арганізацыя Партыі БНФ.
Вінцук Вячорка сказаў, што наступны год стане годам абароны беларускай незалежнасьці.
“Налета найбольш магутна і актуальна загучаць незалежніцкая ідэя. Для Партыі прыйшоў час умацоўваць свае пазыцыі ў краіне і за яе межамі. Я не хацеў, каб гэта чулі прадстаўнікі СМІ, але ладна. У адным буйным горадзе Берасьцейшчыны мне сказалі, што рэальных сяброў БНФ у горадзе засталося тры чалавекі. Нашы прыхільнікі павінны далучыцца і вярнуцца ў Партыю – гэта першасная задача на наступны год. Налета да 90-годзьдзя БНР мы плянуем правесьці форум “За незалежнасьць”, які будзе мець мноства панэляў і сэкцый. Пакуль я зьяўляюся старшынёй БНФ, гарантую, што Партыя застанецца сапраўды незалежнай”, – сказаў В.Вячорка.
Віктар Івашкевіч засяродзіўся на праблеме эўрапейскай інтэграцыі і парлямэнцкіх выбараў.
“Наша памылка ісьці на выбары без пэўных патрабаваньняў ад улады. Калі яны хочуць, каб мы ішлі на выбары і стваралі фасад дэмакратычнасьці, то трэба настойваць на вызваленьні палітвязьняў, вяртаньні ў шапікі і падпіску незалежных газэт, спыніць перасьлед недзяржаўных арганізацый. Асабіста я лічу амаральным ісьці на парлямэнцкія выбары, калі сядзіць Дашкевіч і Фінькевіч. Трэба арганізаваць шырокі рух за далучэньне краіны да Эўрасаюзу. Разам з тым, эўрапейскую тэматыку неабходна зьвязваць і з сацыяльнай. Эўрапейскі сьцяг сёлета абараніў нас ад дубінак АМАПу. Нам трэба палявыя камандзіры, якім мы будзем даваць канкрэтныя і задачы, і чакаць іх вырашэньня. У Фронце сёньня мала людзей, якія здольныя нестандартныя ўчынкі і рашэньні”, – лічыць В.Івашкевіч.
Алесь Міхалевіч гаварыў пра агульную нацыянальную кааліцыю.
“Я ўступіў у БНФ у 1993 годзе, калі Партыя мела ясную праграму. Сёньня яе няма. Людзі помняць брэнд БНФ хутчэй па інэрцыі, а не дзякуючы нам. Калі я стану старшынёй, то найперш аднаўлю выхад партыйнай газэты. Пачну масавы выпуск інфармацыйных матэрыялаў, каб данесьці людзям альтэрнатыўную думку. У Беларусі не такая дрэнная сытуацыя, каб мяняць Лукашэнку на каго папала. Патрэбная шырокая нацыянальная кааліцыя з удзелам Паўла Севярынца, Вячаслава Сіўчыка, КХП-БНФ, руху “За свабоду”, прадпрымальнікаў, каталіцкіх і пратэстанцкіх актывістаў, моладзі, рабочых вялікіх прадпрыемстваў. Толькі ў такім выпадку мы пакажам людзям альтэрнатыву”, – мяркуе А.Міхалевіч.
Вінцук Вячорка, адказваючы на пытаньні сказаў, што ня будзе заставацца ў кіраўніцтве Партыі, калі пераможа Алесь Міхалевіч. “Я не магу станавіцца закладнікам невядомай мне палітыкі”, – сказаў ён. Віктар Івашкевіч паабяцаў, што ў выпадку ягонай перамогі пасады намесьнікаў будуць прапанаваныя, як Міхалевічу, так і Вячорку. У сваю чаргу Алесь Міхалевіч паведаміў, што незалежна ад вынікаў зьезду з Партыі ён нікуды не сыдзе.
Аляксей Кавалец таксама паведаміў, што ўсе менскія гатэлі пакуль адмаўляюцца прадставіць месцы для дэлегатаў зьезду. Пакуль мяркуецца, што рэгіяналаў разьмесьцяць па дамах менскіх актывістаў Партыі.
Каментары