«Па-таварыску заклікаем беларускіх сяброў». У МЗС Расіі папярэдзілі Лукашэнку пільнаваць расійскія інтарэсы ў адносінах з ЗША
У Маскве нагадалі Мінску пра расійскія і кітайскія інтарэсы пры заключэнні «вялікай здзелкі» з Вашынгтонам, а таксама расказалі, што антысанкцыйныя крокі ЗША ў адносінах Беларусі не такія і значныя.
Намеснік кіраўніка расійскага знешнепалітычнага ведамства Міхаіл Галузін у інтэрв’ю ТАСС «па-таварыску» заклікаў Беларусь «захоўваць пільнасць» пры здзелках з ЗША.
Галузіна спыталі, як ён можа пракаментаваць зняцце санкцый ЗША з авіякампаніі «Белавія»?
Ён кажа, што вітае выключэнне авіякампаніі «Белавія» з «чорных спісаў» Мінфіна ЗША, але адзначае, што «ў агульным і цэлым, маштабны санкцыйны рэжым супраць Беларусі працягвае дзейнічаць».
— Застаюцца ў сіле і амерыканскія экспартна-кантрольныя абмежаванні, якія закранаюць авіясектар. У прыватнасці, дазволена эксплуатаваць толькі восем вузкафюзеляжных лайнераў «Боінг-737». Пры гэтым атрыманне любой амерыканскай запчасткі і агрэгата ў выпадку раптоўнай паломкі запатрабуе асобнага ўзгаднення з «рэгулятарамі».
Галузін кажа, што адміністрацыя ЗША пакуль не адмаўляецца ад палітыкі ціску на Беларусь, і «Белы дом гатовы задзейнічаць рычагі эканамічнага ўздзеяння ў любы патрэбны яму момант».
Расійскі дыпламат гаворыць, што РФ вітае «любыя канструктыўныя пачынанні ў кантэксце нармалізацыі беларуска-амерыканскага дыялогу і адмены незаконных абмежавальных мер», але пры гэтым яны «па-таварыску» заклікаюць «беларускіх сяброў захоўваць пільнасць».
Дыпламат пахваліў Лукашэнку, які, каментуючы наладжванне адносін з ЗША, увесь час падкрэслівае, што гэта не ў шкоду Расіі.
«У такім кантэксце цэнім публічныя заявы прэзідэнта Беларусі Аляксандра Лукашэнкі аб тым, што «вялікая ўгода» Мінска з Вашынгтонам магчымая выключна пры ўліку нацыянальных інтарэсаў Рэспублікі Беларусь і адсутнасці шкоды яе супрацоўніцтву з ключавымі саюзнікамі — Расіяй і Кітаем.
Зрэшты, упэўненыя, што з улікам асаблівага характару расійска-беларускіх адносін, любыя спробы недружалюбных дзяржаў знайсці «зазоры» ў нашых пазіцыях у міжнародных справах застануцца бясплённымі», — кажа Галузін.
Цяпер чытаюць
«Калі мне было два гады, сваякі павезлі мяне ў Беларусь». Праз сацсеткі дзяўчына адшукала бацьку-расіяніна — але скончылася гісторыя сумна14
«Калі мне было два гады, сваякі павезлі мяне ў Беларусь». Праз сацсеткі дзяўчына адшукала бацьку-расіяніна — але скончылася гісторыя сумна
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5454
Каментары
А як на расеі цяпер атрымліваюць амерыканскія запчасткі і агрэгаты ў выпадку раптоўных паломак?