Пакуль людзі стаяць у буйных гандлёвых цэнтрах па лядоўні і тэлевізары, дробны бізнэс падлічвае страты і рыхтуецца да горшага.
«Наша Ніва» пагутарыла з тымі, каго не закрануў снежаньскі ажыятаж. Індывідуальныя прадпрымальнікі і невялікія прыватныя гандлёва-унітарныя прадпрыемствы адчулі ў апошнія некалькі тыдняў заўважнае падзенне выручкі. У асноўным, гэта тычыцца тых, хто гандлюе адзеннем і абуткам.
«За гэтыя два тыдні выручка ўпала ўдвая. Да сакавіка дапрацуем, напэўна. А там будзем закрывацца. Можа, перачакаем», — кажа Жанна, ІП. Яна гандлюе вопраткай, возіць яго з Кітая і Турцыі. Вядома, што для паспяховага вядзення бізнэсу ёй патрэбныя долары.
«Ну глядзіце, вось штаны. Каштуюць 650 тысяч. Калі я буду набываць валюту з камісіяй у 30%, дык мне і цану трэба на столькі падняць. А хто купіць штаны за мільён? Ды ніхто», — упэўненая жанчына.
Аліса, таксама індывідуальны прадпрымальнік, гандлюе абуткам. У апошнія два тыдні, кажа яна, пакупнікоў амаль не стала. Каб выратаваць бізнэс, жанчына плануе павышаць цэны. Аднак што з гэтага атрымаецца, яна пакуль не ведае.
Пра тое ж кажуць і гандляры джынсамі, галантарэяй, бялізнай.
Ніна Эдуардаўна, індывідуальны прадпрымальнік і гандляр жаночым адзеннем, таксама адзначае падзенне попыту. Што рабіць, яна пакуль не ведае. Аднак прычыны праблем, упэўненая яна, у саміх людзях.
«Ну а што вы хочаце, калі народ ломіцца ў тыя абменнікі, скупляе валюту? Самі і вінаватыя. Канечне, калі так рабіць, і будзе тое, што цяпер адбываецца», — кажа жанчына.
Не скардзяцца толькі тыя, хто гандлюе таварамі першай неабходнасці — такімі як касметыка, бытавая хімія, і, што цікава, прадаўцы мабільных аксэсуараў.
«Усё ў мяне добра. Як бралі, так і бяруць, праблем не заўважыў», — паціскае плячыма Сяргей, ІП, які прадае чахлы і батарэі да мабільнікаў.
Анатоль Шумчанка, лідар РГА «Перспектыва», якое аб’ядноўвае беларускіх індывідуальных прадпрымальнікаў, кажа: «Сітуацыя з валютай можа стаць тым апошнім каменем, які пацягне на дно беларускі малы бізнэс. А ён і так апошнія часы ледзь-ледзь выплывае», — кажа Шумчанка.
Цяпер чытаюць
Дзядок расказаў, як паводзіў бы сябе ў сённяшняй Беларусі і што будзе далей5
Каментары