Прадукцыйнасць працы на беларускіх дзяржаўных прадпрыемствах у паўтара-два разы ніжэйшая, чым на прыватных.
Пра гэта заявіў памочнік прэзідэнта Беларусі па эканамічных пытаннях Кірыл Руды падчас традыцыйнай міжнароднай навуковай канферэнцыі ў Мінску.
Канферэнцыя праводзіцца штогод з удзелам дзяржслужачых і экспертаў. Выступленні ўдзельнікаў цяперашняй канферэнцыі, якая адбылася ў снежні, апублікаваныя ў апошнім нумары «Экономического бюллетеня», які выдаецца НДЭІ Мінэканомікі.
Як адзначыў Кірыл Руды, для забеспячэння доўгатэрміновага эканамічнага росту ў Беларусі важны такі прыярытэт, як павышэнне прадукцыйнасці працы.
У першую чаргу, падкрэсліў памочнік прэзідэнта, гэта датычыцца прадпрыемстваў з доляй дзяржавы ў статутным фондзе, якія ствараюць у краіне каля паловы валавога дададзенага кошту.
«Пры гэтым эмпірычна пацвярджаецца, што прадукцыйнасць працы на дзяржпрадпрыемствах у сярэднім амаль у паўтара-два разы ніжэйшая, чым на прыватных (напрыклад, пры параўнанні выручкі на аднаго работніка ў Беларусі ў сельскай гаспадарцы, піўной, рыбнай і іншых галінах)», — канстатаваў памочнік прэзідэнта.
У той жа час ён прывёў прыклад Кітая, дзе прадукцыйнасць працы ў кампаніях з замежным капіталам у чатыры разы вышэйшыя, чым у прыватных кітайскіх кампаніях, і ў сем разоў вышэйшая, чым у дзяржаўных.
«Пры гэтым праблема нават не ў тэхналогіях, якія на прыватных і дзяржпрадпрыемствах часта мадэрнізаваныя і падобныя, а ў сістэме кіравання і матывацыі», — лічыць Руды.
На яго думку, матывацыйныя механізмы для беларускіх дзяржпрадпрыемстваў могуць заключацца ва ўкараненні класічнай сістэмы карпаратыўнага кіравання, матэрыяльнага стымулявання (у залежнасці ад выпрацоўкі і рашэння пэўных задач). «Адным з рашэнняў гэтай праблемы можа стаць рэжым «свабоднага плавання» дзяржпрадпрыемстваў (напрыклад, за «буйкамі» — пэўнымі значэннямі прыбытку, рэнтабельнасці і гэтак далей)», — сказаў памочнік прэзідэнта.
Цяпер чытаюць
«Ні тады, ні сёння я не лічу, што зрабіў штосьці кепскае». Дзядок шчыра расказаў пра былыя адносіны з 16‑гадовай дзяўчынай65
Каментары