Прэм'ер-міністр Беларусі Андрэй Кабякоў заявіў, што ўрад будзе і надалей дырэктыўна рэгуляваць цэны. Гэтыя словы прагучалі ў яго інтэрв'ю тэлеканалу «Беларусь-1» 17 студзеня.
«Жорсткі кантроль захаваецца, але ён не будзе вечным. Гэта значыць, гэта жорсткі кантроль на пераходны перыяд», — сказаў Кабякоў.
«Рынак змяніўся, сітуацыя змянілася, магчымасці змяніліся. Таму трэба ўсім падціснуцца. Для таго каб не было разбалансаванасці, будзе жорсткае часовае рэгуляванне цэнаў», — заявіў Кабякоў.
Паводле яго словаў, «як толькі будзе сфарміравана разуменне і прыведзены ў адпаведнасць патрэбы з магчымасцямі, ад такога жорсткага рэгулявання мы адмовімся».
Ён не ўдакладніў да канца, якое разуменне павінна сфарміравацца.
Дэвальвацыя рубля з прыкладна 11000 да прыкладна 15000 цягам месяца прывяла да напружанай сітуацыі на фінансавым рынку і росту цэнаў на тавары і паслугі.
Каментары