Прэзідэнт Украіны Пятро Парашэнка заявіў аб прысутнасці на Украіне дзевяці тысяч расійскіх вайскоўцаў, якія падтрымліваюць сепаратыстаў на ўсходзе краіны.
У сваім выступе на міжнародным эканамічным форуме ў Давосе ён сказаў, што яны ўзмоцнены цяжкай тэхнікай і танкамі.
«Калі гэта не агрэсія, то што тады лічыць агрэсіяй?» — сказаў прэзідэнт Украіны.
Парашэнка таксама прадэманстраваў фрагмент абстралянага пад Валнавахай аўтобуса. У выніку абстрэлу аўтобуса на мінулым тыдні загінулі 13 чалавек. Парашэнка заявіў, што ў аўтобус трапіла расійская ракета.
Сепаратысты і ўкраінскія ўлады адмаўляюць, што маюць дачыненне да гэтага абстрэлу.
Украінскі прэзідэнт заклікаў Расію неадкладна прыступіць да імплементацыі мірнага плана ў Данбасе, вывесці адтуль войскі і сумеснымі намаганнямі перакрыць расійска-ўкраінскую мяжу.
Раней Парашэнка заявіў, што сітуацыя на ўсходзе Украіны можа пагоршыцца, паколькі сепаратысты атрымліваюць падмацаванне з Расіі.
«Яшчэ дзве тысячы расійскіх ваенных перасякаюць нашу мяжу. Разам з двума сотнямі танкаў і бронетранспарцёраў. Мы разумеем, што гэта ўяўляе вялікую небяспеку», - сказаў Пётр Парашэнка ў інтэрв'ю агенцтву Блумберг у Давосе.
Парашэнка таксама заявіў, што ўкраінскія вайскоўцы «гатовыя даць адпор баевікам», аднак улады настроены на мірнае ўрэгуляванне канфлікту.
Каментары