З 1 красавіка памер зарплат кіраўнікоў дзяржпрадпрыемстваў будзе залежаць ад прадукцыйнасці працы. Гэта прадугледжана пастановай Савета міністраў № 214 ад 19 сакавіка 2015 года, якой уненесеныя дапаўненні і змяненні ў пастанову № 597 ад 8 ліпеня 2013 года.
Новы дакумент змяняе парадак устанаўлення каэфіцыента суадносін сярэдняй зарплаты кіраўнікоў і сярэдняй зарплаты па арганізацыі ў цэлым.
Нагадаем, паводле падпункта 2.1 пункта 2 пастановы № 597 памер каэфіцыента не можа перавышаць 8. «Пры гэтым у выпадку невыканання па выніках справаздачнага квартала паказчыкаў чыстага прыбытку і (ці) перавышэння тэмпу росту прадукцыйнасці працы над тэмпам росту заработнай платы, даведзеных ва ўстаноўленым парадку, каэфіцыент кіраўніку арганізацыі ўстанаўліваецца ў памеры, які не перавышае 3 уключна», — растлумачылі ў ведамстве.
Нормамі пастановы № 214 прадугледжваецца залежнасць памеру каэфіцыента толькі ад аднаго з паказчыкаў эфектыўнасці дзейнасці арганізацыі — перавышэння тэмпу росту прадукцыйнасці працы над тэмпам росту заработнай платы. Паказчык «чысты прыбытак» выключаны. Так, калі па выніках справаздачнага квартала тэмп росту заработнай платы перавысіць тэмп росту прадукцыйнасці працы, то кіраўніку арганізацыі варта ўстанавіць каэфіцыент не больш за 4 уключна з першага чысла месяца, што ідзе за справаздачным кварталам.
«Гэтая норма будзе з'яўляцца абавязковай для ўжывання ў дачыненні да кіраўнікоў дзяржаўных арганізацый і арганізацый, у статутным фондзе якіх доля ўласнасці дзяржавы складае больш за 50%. У дачыненні да кіраўнікоў іншых арганізацый ужыванне гэтай нормы носіць рэкамендацыйны характар», — адзначаецца ў каментары.
Умовы кантрактаў кіраўнікоў арганізацый павінны быць прыведзеныя ў адпаведнасць з пастановай № 214, адзначылі ў Мінпрацы.
Цяпер чытаюць
У Мінску адбыліся масавыя затрыманні выдаўцоў і кнігараспаўсюднікаў24
Каментары