Расійскі нацыяналіст Бялоў заявіў, што ФСБ намаўляла яго забіць Каламойскага
Лідар нацыяналістычнай арганізацыі «Рускія» Аляксандр Бялоў (Поткін) сцвярджае, што расейскія спецслужбы прапаноўвалі яму паспрыяць забойству ўкраінскага алігарха Ігара Каламойскага або яго арышту.
Пра гэта ён заявіў у інтэрв'ю выданню «Кашын», перададзеным з СІЗА незадоўга да яго пераводу на псіхіятрычнае абследаванне.
«Я ведаў, што мне пагражае расправа з боку рэжыму [Расіі]. Мне было вядома, што розныя структуры атрымалі ўказанне ўзяць мяне ў распрацоўку. Магчыма, вы памятаеце, што я аказаўся ў апублікаваным спісе асоб, якія падлягаюць арышту па Балотнай справе», — заявіў Бялоў.
«Правакацыі і схіленне асоб з майго акружэння да агавору не спыняліся ніколі. Увесну 2014 года мне стала вядома, што замова на мяне паступіла з Казахстана», — адзначыў ён.
Бялоў сцвярджае: «На мяне выходзілі супрацоўнікі ФСБ, якія фармулявалі, як мне здавалася, інтарэсы расейскай улады ў дачыненні да маёй дзейнасці. У тым ліку па кантактах з апазіцыяй Назарбаеву і ў дачыненні да ўкраінскіх палітыкаў».
«У выніку я зразумеў, што ніякіх інтарэсаў нацыянальнай бяспекі ў ФСБ няма. Усе прапановы і пытанні звяліся да жадання ўцягнуць мяне ў рэйдарскі захоп расійскіх прадпрыемстваў і ўдзелу ў тэрарыстычнай дзейнасці на тэрыторыі Украіны і Францыі», — паведаміў ён.
«Прынамсі, абяцанне пакінуць мяне ў спакоі (і людзей, якія так ці інакш са мной звязаныя) было дадзена пад умовай, што мы вырашым пытанне з Барадой. Гаворка ішла аб арганізацыі ліквідацыі, забойства, або лабіяванні арышту на тэрыторыі Францыі Ігара Каламойскага», — заявіў Бялоў.
«Відаць, зразумеўшы, што я не буду ўдзельнічаць у падобных праектах, мяне вырашылі прынесці ў ахвяру Назарбаеву, улічваючы асцярогі па магчымым маім удзеле ў якіх-небудзь народных выступах супраць палітыкі ўрада РФ», — дадаў ён.
Па словах Бялова, расійскія спецслужбы выконваюць просьбы «састарэлага дыктатара, бо ад яго залежыць пазіцыя Казахстана па Украіне» і будучыня Мытнага саюза.
Раней паплечнік Бялова Дзмітрый Дзёмушкін заяўляў, што ім прапаноўвалі адпраўляць добраахвотнікаў у Нацгвардыю Украіны.
«Гэта высокапастаўленыя супрацоўнікі, якія хацелі праз гэтыя батальёны ўкараняць сваю агентуру, і каб мы збіралі (добраахвотнікаў). А потым мы б, як зборшчыкі наймітаў, селі ўсе, і рускія нацыяналісты былі б дыскрэдытаваныя», — казаў ён.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»7
Каментары