Астэроід з дзве траціны Нацыянальнай бібліятэкі вернецца да Зямлі
Хутчэй за ўсё, з Зямлёй ён не сутыкнецца. Але калі сутыкнецца, будзе як з Тунгускім метэарытам.
Прыкладна 12 кастрычніка 2017 года на мінімальную адлегласць да Зямлі наблізіцца астэроід 2012TC4. піша Phys.org.
Верагодна, астэроід праляціць міма — шанцы сутыкнення з Зямлёй навукоўцы ацэньваюць у 0,00055%.
Хутчэй за ўсё, ён пройдзе міма Зямлі на адлегласці ў 300 тысяч км, што складае 0,79 сярэдняга радыуса арбіты Месяца.
Памеры 2012TC4 могуць дасягаць 40 метраў (найменшая ацэнка — 12 метраў). Для параўнання, ромбакубаактаэдр Нацыянальнай бібліятэкі мае дыяметр каля 60 метраў, а славуты Чалябінскі метэарыт меў дыяметр каля 20 метраў.
Калі з нейкіх прычын 2012TC4 сутыкнецца з Зямлёй, удар будзе параўнальным з выбухам бомбы ў 5 мегатон у тратылавым эквіваленце. Мяркуецца, што прыкладна такім быў Тунгускі метэарыт — плошча паражэння ад яго ўдару была параўнальнай з плошчай Масквы.
Астэроід 2012TC4 ужо пралятаў міма Зямлі ў 2012 годзе. Тады дыстанцыя была нават меншай — 0,247 радыуса арбіты Месяца альбо 95 тысяч км.
На красавік 2015 года астраномы ведаюць 1572 патэнцыйна небяспечных для Зямлі астэроіды. Да 2050 года на адлегласці, меншай за радыус Месяца, каля Зямлі пралятуць прынамсі 11 астэроідаў.
Беларускія абрады, арнаменты і беларуская мова паўсюль. Як нашчадак перасяленцаў зрабіў сяло каля Байкала зноў беларускім, і чаму гэта можа хутка скончыцца99
Каментары