Празрыстую браню са шпінелі плануюць рабіць у ЗША
Аптычныя прылады, якія не патрабуюць дадатковай абароны, трываласць на ўзроўні браніраванага шкла — гэта абяцаюць вучоныя з Лабараторыі ваенна-марскіх даследаванняў ЗША (NRL), якія распрацавалі новыя тэхналогіі па выкарыстанні аксіду магнію і алюмінію ці, прасцей, шпінелі.
«Ён нашмат больш трывалы і цверды, чым шкло. Ён забяспечвае лепшую абарону ў больш небяспечных умовах», — адзначае Джас Сангера, кіраўнік групы, якая вывучае мінерал.
Вучоныя NRL прыдумалі, як рабіць са шпінелі празрыстыя загатоўкі любой формы і сінтэзаваць саму шпінель, паведаміў сайт ваенна-навуковай арганізацыі nrl.navy.mil.
«Складнікі можна знайсці па ўсёй зямлі, таму іх можна набываць па адносна нізкім кошце», — кажа Сангера.
Плануецца, што новая тэхналогія будзе выкарыстаная як для гадзіннікаў і смартфонаў, гэтак і для вайсковых мэтаў.
Гэтак, браніраваныя вокны са шпінелі будуць значна лягчэйшыя і танчэйшыя, чым звычайныя — разы ў 2 ці нават болей. А гэта важна ў тым ліку для бранятэхнікі, самалётаў і беспілотнікаў.
Да таго ж, аптычныя прылады са шпінелі не будуць патрабаваць такой складанай абароны, якая неабходная сучасным камерам і прыцэлам.
У будучым вучоныя лічаць, што іх тэхналогія будзе выкарыстаная для лазераў новага пакалення.
Каментары