Кіраўнік французскіх крайне правых Марын Ле Пен прыбыла з чарговым візітам у Маскву.
Пра гэта ў аўторак, 26 траўня, паведаміла агенцтва Reuters. Пры гэтым у афіцыйнай праграме лідара Нацыянальнага фронту, апублікаванай на сайце партыі, візіт Ле Пен у Расею не значыцца, перадае Radio France International.
Як паведамляецца на сайце Дзярждумы РФ, Марын Ле Пен сустрэлася са спікерам Сяргеем Нарышкіным.
У паведамленні ніжняй палаты парламента адзначаецца, што Нарышкін «павіншаваў Марын Ле Пен з паспяховымі выбарамі ў Еўрапарламент (яны прайшлі 25 мая 2014 года — RFI), а таксама ў рэгіёнах, дзе Нацыянальны фронт набыў дадатковыя месцы».
«Дасягнуць такога выніку, атрымаць сімпатыі выбаршчыкаў атрымалася дзякуючы вашаму асабістаму ўплыву, новым партыйным устаноўкам, якія адпавядаюць часу і духу сучаснай Францыі», — звярнуўся да Марын Ле Пен Нарышкін. Паводле яго слоў, «сёння Нацыянальны фронт ўваходзіць у лік вядучых палітычных сілаў Францыі».
Агенцтва France-Presse адзначае, што журналістам расійскіх і замежных СМІ, якіх спачатку запрасілі прысутнічаць на гэтай сустрэчы, пазней паведамілі, што яна пройдзе пры зачыненых дзвярах. Трансляцыя перамоваў Нарышкіна і Ле Пен па расійскім тэлебачанні таксама была адменена.
Раней Марын Ле Пен ужо неаднаразова прыязджала ў Маскву і сустракалася з Сяргеем Нарышкіным. Апошні раз яна была ў расійскай сталіцы ў красавіку 2014 года, праз некалькі тыдняў пасля анексіі Крыма, і выступіла тады за федэралізацыю Украіны.
Са свайго боку, расійскія парламентарыі ўдзельнічалі ў з'ездзе Нацфронту ў Ліёне ў канцы лістапада 2014 года.
У верасні 2014 Нацыянальны фронт атрымаў ад Першага чэшска-расійскага банка крэдыт памерам 9 мільёнаў еўра.
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары