Аўтар «Нашай Нівы», кандыдат гістарычных навук Дзяніс Марціновіч стаў уладальнікам Першай нацыянальнай літаратурнай прэміі. Прэмія прысуджана ў намінацыі «Найлепшы крытычны твор» за кнігу «Жанчыны ў жыцці Уладзіміра Караткевіча».
Намінанты Першай нацыянальнай літаратурнай прэміі былі названы на цырымоніі адкрыцця ХХII Дня беларускага пісьменства ў Шчучыне, паведамляе БелТА.
Шэсць аўтараў сталі намінантамі прэміі, хоць конкурс быў аб'яўлены па сямі намінацыях. Намінацыя «Дэбют» не знайшла свайго пераможца. Усяго на конкурс было заяўлена 45 работ.
У намінацыі «Найлепшы твор паэзіі» уладальнікам прэміі стала актывістка афіцыйнага Саюза пісьменнікаў Тамара Краснова-Гусачэнка за кнігу «Сустрэча».
Уладзімір Саламаха з кнігай «І няма шляху чужога» названы найлепшым у намінацыі «Найлепшы твор прозы».
Найлепшым творам драматургіі названы цыкл сцэнарыяў для перадач «Зваротны адлік» (АНТ) беларускага сцэнарыста, празаіка, лаўрэата значных прэмій, кандыдата гістарычных навук Наталлі Голубевай.
У намінацыі «Найлепшы твор публіцыстыкі» прэмія прысуджана Міхаілу Шыманскаму за кнігу нарысаў «Мы гэтай памяці верныя».
Названы найлепшы дзіцячы аўтар. У намінацыі «Найлепшы твор для дзяцей і юнацтва» прэмія прысуджана Ганне Скаржынскай-Савіцкай за кнігу казак «Надзейка-чарадзейка».
Каментары