Тыдні Германіі пройдуць у Беларусі з 25 верасня па 24 кастрычніка і будуць прысвечаны 25-годдзю аб'яднання Германіі. Пра гэта паведаміў сёння на прэс-канферэнцыі Надзвычайны і Паўнамоцны Пасол ФРГ у Беларусі Петэр Дэтмар.
Правядзенне Тыдняў Германіі ў Беларусі ўжо стала добрай традыцыяй. Гэта мерапрыемства арганізуецца на працягу больш як дзесяці гадоў. У гэтым годзе Тыдні Германіі будуць асабліва маштабнымі і прадоўжацца амаль месяц з нагоды юбілейнай даты. Іх праграма адрасавана ўсім, хто цікавіцца нямецкай культурай, мовай і грамадствам. Пазнаёміцца з Германіяй беларускай грамадскасці дапамогуць фільмы і музыка, тэатр і літаратура, фотавыстаўка і іншыя мерапрыемствы. Адкрыюцца Тыдні выстаўкай на тэму «Шлях да адзінства Германіі».
«За мінулыя гады Тыдні Германіі сталі неад'емнай часткай работы ў галіне нямецкай культуры ў Беларусі. Яны праводзяцца пасольствам Федэратыўнай Рэспублікі Германія разам з іншымі германскімі ўстановамі і нямецкімі пасрэднікамі ў галіне культуры ў Беларусі ў супрацоўніцтве з беларускімі партнёрамі», — расказаў Петэр Дэтмар.
Каментары