Удзельнікі трохбаковай кантактнай групы па Украіне на сустрэчы 29 верасня ў Мінску падпісалі дакумент аб адводзе танкаў, артылерыі калібрам да 100 мм і мінамётаў калібрам да 120 мм. Пра гэта журналістам паведаміў па выніках перамоў спецпрадстаўнік старшыні АБСЕ ў кантактнай групе Марцін Сайдзік.
Сайдзік выказаў удзячнасць членам падгрупы па бяспецы за іх «вялікую працу». «Яны зрабілі тое, што павінны былі зрабіць згодна з комплексам мер, і сапраўды інтэнсіфікавалі працэс, — зазначыў пасол. — Падпісана дапаўненне да комплексу мер. Тэкст падпісалі прадстаўнікі Расіі, Украіны і АБСЕ ў кантактнай групе. Спадары Захарчанка і Плотніцкі (лідары самаабвешчаных ДНР і ЛНР. — БелаПАН.) яго яшчэ не падпісалі. Але прадстаўнікі асобных раёнаў Данецкай і Луганскай абласцей спадар Пушылін і спадар Дзяйнега паабяцалі, што, як толькі яны вернуцца дадому, дакумент будзе падпісаны».
Еўрадыпламат удакладніў, што дапаўненне прадугледжвае адвод узбраення на 15 км ад лініі сутыкнення. Паводле яго слоў, гэта будзе праводзіцца ў два этапы і пачнецца праз два дні пасля поўнага спынення агню. Першы этап разлічаны на 15 дзён, другі — на 24 дні.
Пасол паведаміў, што спецыяльная маніторынгавая місія АБСЕ будзе ажыццяўляць маніторынг і верыфікацыю працэсу адводу ўзбраенняў.
Сайдзік упэўнены, што дасягнутыя сёння пагадненні «будуць істотным унёскам ва ўмацаванне рэжыму спынення агню і Мінскага працэсу ў цэлым».
Каментары