Ідэалогія развіцця Мінска прадугледжвае захаванне зялёнага пояса вакол горада
Ідэалогія развіцця Мінска прадугледжвае захаванне зялёнага пояса вакол горада, паведаміў сёння на прэс-канферэнцыі старшыня камітэта архітэктуры і горадабудаўніцтва Мінгарвыканкама Павел Лучыновіч.
Павел Лучыновіч адзначыў, што пытанне стратэгіі развіцця горада з'яўляецца трэцім па значнасці, якім цікавяцца мінчане. «Ідэалогія яго далейшага развіцця — захаванне зялёнага пояса вакол горада і развіццё гарадскіх падцэнтраў, каб у нас не было дэпрэсіўных закінутых тэрыторый, каб не адбывалася канцэнтрацыі ўсяго насельніцтва ў цэнтры горада», — сказаў ён.
Цяпер Мінск ідзе па шляху вырашэння актуальных праблем, вызначаючыся, якім будзе горад у далейшым — з вялікай шчыльнасцю, шматпавярхоўнасцю або больш еўрапейскі, малапавярховы.
Развіццё Мінска хутчэй бачыцца ў еўрапейскіх тэндэнцыях. «У нас усё ж такі еўрапейская тэндэнцыя, і параўнанне з азіяцкімі гарадамі не зусім карэктна», — заўважыў Павел Лучыновіч. Ён не згадзіўся, што вышынныя будынкі, якія з'яўляюцца ў беларускай сталіцы, набліжаюць яе да сусветных гарадоў, чыё аблічча фарміруюць шматузроўневыя будынкі. «У Дубаі колькасць будынкаў вышэйшых за 300 м, напэўна, адна з самых вялікіх па шчыльнасці канцэнтрацыі ў свеце. Калі параўноўваць, то ў нас у бліжэйшыя гады адзін з самых высокіх будынкаў будзе новы шматфункцыянальны цэнтр «Газпрама». Яго вышыня складзе 186 м. Нам да Дубая вельмі далёка», — сказаў Павел Лучыновіч.
Старшыня камітэта архітэктуры і горадабудаўніцтва дадаў, што пытанне аб дадатковым размяшчэнні 11 тыс. жыхароў у раёне Каменная Горка не актуальнае, паколькі горад ад такога сцэнарыя адмовіўся.
Павел Лучыновіч расказаў, што ў час прыёму грамадзян і прамых ліній каля 70 працэнтаў пытанняў датычаць захавання сядзібнай жылой забудовы, на другім месцы — тэма захавання зялёных зон. «Тэма зялёных зон вельмі актуальная. Нам неабходна захоўваць існуючую водную сістэму і развіваць зялёныя тэрыторыі, якія зарэзерваваны генеральным планам. Размова ідзе пра другое левае паўкальцо Лошыца — рака Мышка, таму што там знаходзяцца буйнейшыя раёны горада — Каменная Горка, Сухарава, Кунцаўшчына, Паўднёвы Захад, Малінаўка. Гэта важная праблема, зелені на гэтых тэрыторыях не хапае», — лічыць ён.
Каментары