Беларускія студэнты накіравалі ў Еўрапейскі студэнцкі саюз зварот з просьбай аб салідарнасці.
Зварот падпісалі актывісты чатырох студэнцкіх структур — «Брацтва арганізатараў студэнцкага самакіравання» (БАС), «Супольнасці беларускіх студэнтаў», «Студэнцкай рады» і «Цэнтра развіцця студэнцкіх ініцыятыў», а таксама група студэнтаў, якія выступаюць супраць платных адпрацовак.
Як паведаміў кіраўнік БАС Аляксандр Луцэвіч, аўтары звароту паведамляюць пра пачатак кампаніі па зборы подпісаў студэнтаў, якія выступаюць за адмену платнай пераздачы экзаменаў і залікаў ва ўсіх ВНУ Беларусі. Арганізатары кампаніі плануюць сабраць як мінімум 10 тысяч подпісаў, якія будуць накіраваны міністру адукацыі Міхаілу Жураўкову.
«Мы заклікаем Еўрапейскі саюз і Еўрапейскі студэнцкі саюз выказаць салідарнасць з беларускімі студэнцкімі актывістамі, якія церпяць ад рэпрэсій з боку адміністрацыі сваіх ВНУ», — гаворыцца ў заяве. Яго аўтары просяць Еўрапейскі студэнцкі саюз выступіць з заявай аб недапушчальнасці якіх-небудзь парушэнняў акадэмічных свабод і любых рэпрэсій у дачыненні да студэнтаў беларускіх ВНУ.
Як паведамлялася раней, паміж студэнтамі і адміністрацыяй БДУ разгарэўся канфлікт з прычыны ўвядзення платы за пераздачу экзаменаў і залікаў. Студэнты галоўнай ВНУ краіны арганізавалі збор подпісаў пад зваротам да міністра Жураўкова і рэктара БДУ Сяргея Абламейкі супраць запланаванага новаўвядзення. 11 лістапада зварот перадалі ў рэктарат БДУ, пад ім падпісаліся больш як 2,5 тысячы чалавек, аднак ужо 12 лістапада ў ВНУ было прынята палажэнне аб аплаце паўторнай здачы экзаменаў і залікаў.
На круглым стале ў Мінску 19 лістапада ініцыятары звароту паведамілі, што на студэнтаў, якія бралі ўдзел у зборы подпісаў, аказваецца націск. Паводле іх слоў, супрацоўнікі аддзелаў па выхаваўчай і ідэалагічнай працы выклікаюць студэнтаў і вядуць з імі гутаркі, пасля якіх маладыя людзі вымушаны адмаўляцца ад актыўных дзеянняў. Такая сітуацыя акрамя БДУ назіраецца ў Беларускім дзяржаўным педагагічным універсітэце імя Максіма Танка, дзе студэнты таксама ўзнімалі пытанне пра адмену платы за пераздачу экзаменаў.
Адзін са студэнтаў БДУ на ўмовах ананімнасці расказаў, што студэнтам, якія збіралі подпісы, гаварылі аб тым, што «яны ўдзельнічаюць у палітычным жыцці, што за імі хтосьці стаіць і плаціць за збор подпісаў». Паводле яго слоў, студэнтам намякалі, што імі могуць «зацікавіцца органы». Акрамя таго, адміністрацыя БДУ зрабіла больш жорсткім кантроль наведвальнасці заняткаў.
«Гэта адбываецца для запалохвання студэнтаў. Маладыя людзі баяцца быць адлічанымі, баяцца, што іх прызавуць у армію. І гэты сродак націску мае свой вынік — многія з актыўных студэнтаў адмовіліся ад удзелу ў кампаніі», — расказаў суразмоўца.
Цяпер чытаюць
Зяленскі: Рэтранслятары на мяжы Беларусі прыпынілі працу71
Каментары