Беларус толькі вызваліўся з калоніі і забіў дзвюх пажылых жанчын на лецішчы
Падрабязнасці жудаснай гісторыі ў Лагойскім раёне.
18 лістапада 43‑гадовы мужчына вызваліўся пасля адбыцця пакарання. Ён паехаў у вёску Забярозаўка Лагойскага раёна. Там пасяліўся ў лазні на тэрыторыі аднаго з участкаў.
На працягу тыдня абвінавачаны тайна жыў у доме, з якога раней краў рэчы, паведамляе Генпракуратура.
28 лістапада гаспадыня дома прыехала на лецішча з сяброўкай. Мужчына збіў палкай 77‑гадовую гаспадыню дома і яе 70‑гадовую знаёмую, пасля чаго адключыў іх мабільныя тэлефоны.
Ён пераканаў жанчын сабраць асабістыя рэчы і перадаць яму ключы ад гаража і аўтамабіля Toyota, на якім нібыта павінен быў адвезці іх у бальніцу. Пры гэтым ён узяў з сабой рыдлёўку і сякеру.
Абвінавачаны адвёз жанчын да вёскі Ніўкі. Там ён выцягнуў іх з аўтамабіля, нанёс ім сякерай мноства ўдараў па галаве і канечнасцях. Пераканаўшыся, што жанчыны мёртвыя, закапаў іх целы.
Затым мужчына вярнуўся ў Забярозаўку, скраў іх маёмасць, у тым ліку некалькі бутэлек алкаголю, шакаладкі, цукеркі, дрыль-шурупавёрт, смарт-камеру і батарэйкі.
29 лістапада яго затрымалі ў Лагойску.
«Адметна, што раней мужчына адбываў пакаранне за крадзеж маёмасці адной з пацярпелых на гэтым жа дачным участку ў в. Забярозаўка Лагойскага раёна, які ён здзейсніў у 2022 годзе», — дадалі ў пракуратуры.
Яму інкрымінавана забойства дзвюх пажылых жанчын, а таксама крадзеж (ч. 2 арт. 205, п.п. 1, 2, 6, 16 ч. 2 арт. 139, ч. 3 арт. 205 Крымінальнага кодэкса). Справа перададзена ў суд.
Каментары
А людзі за лайк на 8 гадоў у калоніі.
Лукашысты, вы зусім дурныя?