Польскі суд адмяніў дату перадачы дзіцяці бацьку, які хацеў вывезці яго ў Беларусь
Польскі суд адмяніў прызначаную на 27 чэрвеня перадачу дзіцяці яго біялагічнаму бацьку пасля разгляду апеляцыі, пададзенай апякункай хлопчыка Ганнай Канавалавай. Пра гэту гісторыю паведамлялася раней.
Пра рашэнне суда паведаміла сама Канавалава разам з ініцыятывай Partyzanka. Паводле яе слоў, яно стала вынікам працяглай барацьбы з удзелам праваабаронцаў, юрыстаў, журналістаў і грамадскіх актывістаў.
«Наш малы застаецца дома, побач з людзьмі, якіх лічыць сваёй сям'ёй», — адзначыла яна.
Ганна Канавалава пераехала ў Польшчу з Беларусі разам з двума ўнукамі, бацькі якіх былі асуджаныя па палітычных артыкулах. Пазней пад яе апекай аказаліся яшчэ двое дзяцей — Алесь, за якога цяпер і вядзецца барацьба, і ягоны старэйшы зводны брат Яўген. Польскія органы апекі перадалі дзяцей Ганне пасля праверкі сямейных абставін — іх маці мела алкагольную і наркатычную залежнасці і на гэты момант ужо памерла.
У 2023 годзе біялагічны бацька Алеся, які жыве ў Мінску і раней сядзеў у турме за гандаль наркотыкамі, аднавіў кантакт з сынам. Канавалава не перашкаджала зносінам і нават дапамагла яму атрымаць польскую візу. Аднак пазней мужчына звярнуўся ў суд з патрабаваннем перадаць яму апеку над дзіцем.
Суд першай інстанцыі падтрымаў бацьку. Пры гэтым падчас разгляду справы ён не паведамляў пра намер вывезці хлопчыка ў Беларусь. Калі такая інфармацыя стала вядомай, Канавалава падала апеляцыю.
Асаблівую ўвагу ў справе прыцягвае тое, што дзіця мае ў Польшчы статус міжнароднай абароны. Канчатковае рашэнне па справе яшчэ не прынята, таму судовыя разборы працягнуцца.
Каментары