КДБ: Шэсце ў Сапоцкіне з імперскімі сцягамі было праведзена ў рамках заканадаўства
24-гадовы мінчук Аляксандр у кастрычніку 2015 года накіраваў зварот у КДБ з пытаннямі аб дзейнасці казацкіх арганізацый на тэрыторыі Беларусі. Апошняй кропляй было шэсце ў Сапоцкіне (Гродзенскі раён), дзе казакі выкарыстоўвалі расійскія імперскія сцягі.
Гэта было падчас працэсіі ў гонар 101-й гадавіны цудоўнага аб’яўлення Прасвятой Багародзіцы ў Аўгустоўскіх лясах. Чорна-жоўта-белыя сцягі з Мінска прывезлі прадстаўнікі арганізацыі «Казачы спас».
Чорна-жоўта-белы сцяг выкарыстоўваўся ў XIX стагоддзі як гербавы сцяг Расійскай Імперыі. Сёння яго на ўзбраенне ўзялі расійскія шавіністы — тыя самыя, што хочуць далучэння Беларусі да Расіі. У шэсці таксама бралі ўдзел памежнікі.
«Прашу ўдакладніць, наколькі выкарыстанне дадзенай сімволікі дзяржаўнымі органамі і ваенізаванымі арганізацыямі адпавядае Закону Рэспублікі Беларусь. А таксама прашу праверыць, ці не з’яўляецца актыўнасць так званых «казакоў» і дзеянні такога кшталту, як шэсце пад сцягамі Расійскай імперыі, пагрозай для суверэнітэта Рэспублікі Беларусь», — напісаў Аляксандр.
Адказу з КДБ не было на працягу 40 дзён, расказаў ён «Нашай Ніве». Пасля чаго Аляксандр звярнуўся ў Генеральную пракуратуру, толькі пасля гэтага Камітэт дзяржбяспекі вымушаны быў даць адказ.
Ліст прыйшоў за подпісам першага намесніка кіраўніка КДБ Ігара Сяргеенкі. У адказе гаворыцца:
«Паведамляем, што мерапрыемства 2015.09.13 у г.п. Сапоцкін Гродзенскага раёна было праведзена ў рамках дзеючага заканадаўства».
Аляксандр расчараваны адказам КДБ.
«Выходзіць, што за выкарыстанне бел-чырвона-белага сцяга і Пагоні караюць у судах, а за імперку — не. Мяне хвалюе не канкрэтная сітуацыя ў Сапоцкіне — шэсце прайшло і нічога не зробіш, а наогул уся дзейнасць так званых «казакоў», якія ўсё больш лезуць у справы краіны. І на гэтае пытанне адказу я не атрымаў», — так пракаментаваў «Нашай Ніве» гэты адказ Аляксандр.
Каментары